Temelenshi tajung alitsü asoshi nüburtemi merangtsüla: Suu Kyi

Demoso, September 10 (Agencies): Myanmar linüki alizüng ayuba ama, temelenshi tajung alitsü nükjidong nung nüburtemi election nung vote agüja shilem agitsü tajungshiba olen ka Myanmar opposition lenila, Aung San Suu Kyi-i tanü Brehostibar nü metetdaktsüogo.

Myanmar’er Thailand arrtsülen, Kayah State nung densemba Demoso semdanga idakji ayongba election den sentakba nüboyimtsü sentong nung o jembia shilem agidang, Suu Kyi-i iba olenji metetdaktsü.

Suu Kyi-i tanü semdangba jilaji Myanmar Tir, Thein Sein-i tenzükba rongsenren telemshi sentong ketdang asüsang, President’s Office Minister aser taküm November ita agitsü ayongba general election nung candidate ka ama shilem agitsü renema alisang, So Thein’er constituency kübok densemba jila lir.

“Asen linük nung temelenshi tajung bener arutsütsü sorkar tasen tentettsü nükjidong nung tulu yua lir aser taküm küm tatembanglen agitsü ayongba election nung asenoki tongti shilem agiba ajanga asen linük nung chijiba temelenshi tajung bener arutsütettsü. Anungji, nüburtemi iba maongka tajung amajok nung mesüidaktsütsü ajungshir,” ta National League for Democracy (NLD) yimtenren telok lenila, Suu Kyi-i tanü sangoktsü.

Mitkartem ket nungi nübur lenirtemi par Myanmar indang yimsüsütsü tashi agizükba sülen tang mezüngsüa democracy yismsüsütsü yimya benshia agitsü ayongba general election sentong nung Suu Kyi-i aniba NLD teloki takok angutsü teimla tulu nüburtemia yua lir.

Lar NLD teloki taoba mapang, 1990 agiba election sentong nunga takok tulu angu saka mitkartemi iba takokbaji magizükba osang bushiteta lir.

Tan agitsü ayongba election nung takok anguba yimsüsürtemi House 2 densemba parliament menden taruba küm 5 tashi abentsü temeten angutsü aser parnoki Tir tasenba kümdaktsütsü asoshi yimsüsür 3 shimtettsü.

Tesülen, parliament züngsemtemisa yimsüsür asem rong nungi ka shimteta par linük indang Tir menden bendaktsütsü asoshi Myanmar linük temzüng nung lateta lir.

Ajisüaka, bendanger den kibong akümba den külemi, lar jabaso anapronglai bendang senso agia aliba yong Suu Kyi-ibo Tir menden abentsü maongka mongutettsüsa tang jenjang ajurua lir.

Mitkartemi latetba linük temzüng nung bendanger den kibong akümer mesüra pei chirnuri bendang senso agia aliba nisungtem nem Tir menden abentsü temeten magütsütsü asoshi linük temzüng nungsa lateta lir.

Suu Kyi-i maneni Bawlakhe jila semdanga idakji ayongba election nüboyimtsü sentong nunga o jembia shilem agitsü sentong renema osang jangjaogo.