Temelenshi tajung ka angur

Tang alima ajaklen tasüba tashidak Covid-19 wara anema raraba nung alima shia pei pei lima aser nübortem dak apet anogo aser mapang shia inyakyim melenpet melena aoba mapang ka lir. Item inyakyimtem rongnung nisungtem kima yimdong nung pei mulungba mapang mashi ka nung senzütsü memelar, shishilembadaka akhi ama dokantem pei pei mulungba mapang melapokdaktsür aser garitema pei senzünüba mapang apia mesenzüdaktsür. Item ajakji nisungtem rongnung memetetika tashidak menatepa moudaktsütsü asoshi government-i anepaluba mapatem lir. Aji oda, Dimapur nunga nisungtem tali kima yimdongi adoka menungzüdaktsütsü asoshi anogo shia gari number balala senzütsü ozüng ka agüja lir. Iba inyakyim ajanga Hombar, Bodbar aser Hokolbar anogotem nung gari number 1,3,5,7,9 agi atemba garitem senzütsü melar aser tanga tanüngba anogotem nung gari number 2,4,6,8 aser 0 agi atembatem senzütsü melar. Tetezü anogo asem nü ana agi alemtsü makokba züngya (odd number) agi tembangba gari number alirtem senzütsü aser anogo pezünüji ana agi alemtsü akokba züngya (even number) agi tembangba gari number alirtem senzüdaktsütsü. Iba inyakyim ajanga anogo shia yimti nung alir gari tesadangka mesenzüdaktsüi nokdanger aser tashi manga senzüra sen achir. Iba ozüng ya yakanü May 11 Hombar nü nungi amshi tenzükba anogo nung ozüng raksartem gari 746 dang senchi achiba sen ajak agi 1,41,050 ( Sen lakh ka meyirijang lirka ser tenem) sarutetogo aser iba senji government senpong nung enoktsütsü ta Dimapur Police Commisioner-i metetdaktsüba osangji meimlaba osang tajung ka lir.Ashiko, tamalena yamala ozüng raksartem dang police-temi senchi achiba sen government senpong nung enokja alitsüa akok saka tangashibo tangang angashir. Anogo ka nung yimti ka kija nung police-temi ozüng raksartem dang nungi sarutetba sen lakh dak tali government senpong nung enoktsü tenzukbaji Nagaland nung ochi laoa aliba shia arur südi ta kanga pelaa bilemer. Mapang shia Nagaland gate nung department balalai saru saruba indang jembir saka itemji government senpongi aitba indang jembiba kangabo mangashir. Taküm küm Covid-19 wara agi matongdanga, Manipur nungbo ILP amshi tenzükba ita nung sen crore dak tali arua government senpongi aiba osang asenoki iba yimobilem nung züngogo. Item denji kodang asen lima nung government asoshi saruba sarutem indang medemdanga bilemdangdir, ashiko, Nagaland nungbo taoba küm 56 ILP agütsüba nungi aruba sen government senpongi aibaji sen crore a majung alitsü südi. Asen lima nung ILP agütsütsü aser gate anüktsü rakteper saka item nungji sarutetba sen government senpongi aitba osangbo mali ta aruba agi, asenok ajak senteper Civil Secretariat nung süngo ajemba sena dena, center government-i magütsüra, asenoksasabo memenoktetter. Tanga state nung ama, Nagaland nunga sen arutsüla mapa inyakba (Revenue generating) department aika lir saka item ajak nung jagi aruba sen agi asenoki küm piyong achiba sen noklang nung shilem ter a memenoktetter, ibaji alima tsüngdang taaktsüka lir. Iba ama mapang ka nung, Dimapur Policetemi kenü kima yimdong nung nokdaker garitem mitba mapang ozüng raksartem dang nungi sarutetba sen government senpong nung enoktsübaji Naga nunger tuluba nungi shir tilatiba tashi asoshi tangazüktsü aser temelenshitsü mapa aser mapang ka kümdaktsütsüla. Ochimashiba maparen ochishia kümdaktsütsü asoshi tatar senden nung ozüng ka latettsü menüngdaker mesüra anogo balaka ka ataa lumia amongtsüa menüngdaker, saka tang Dimapur police-temi inyakba amaji, tanü asenok kechi wadang nung nokdaka lir, iba nungji asenok ajak ochishia inyak tenzüktsü tim. Delhi nungi sen talubosa yokba agi masü saka asenoki tang amaji mapa tilaka nungi ochishia inyaka tenzükba agiang Nagalandbo tajungba küma melenshitettsü.