Temelenshiba putu

Küm metsü jakdang alima aso 20 buba tatembang kati arudang alima aso 21 buba nungbo temelenshi tulu alitsü, anungji tesüngmangtsüka asütsü ta jembia aruba to, tanü asenoki maparen aika nung ajangshia arudagi. Atangji, memetetiaka alima aso 21 buba nunga joko mezüng küm 20 buba nung ita pezübubai ayaokogo aser tang asenoki iba putu tasenba nung ajangshiba tesüngmangtsü mapatem rongnung computer adoka internet ajanga teka nung smart mobile phone tilaka ama yur alima tesem balala nung tongtepratepa inyakba mapatem ya asütsü. Iba yagi tongtepratep melaba dang masü saka asenok koba anogo nungsa alima tesem koba nung liasüar metetadoker. Joko, asenok nüngdak tapu balala inyaktsü asoshia tonga mouaka kidang nungi internet ajanga mobile nungi meshitsü, asüngdangtsü, alitsü aser metetdaktsütsü akoker. Atangji, osangkakettem teka nung amer azüngba tetka jangratem mali aser tenük asoshia anisüngzüker saka tang ama tensa mapang majungba ajanga osangkakettem ki tonga marutetaka, anepdang anü madokdangyongi mobile nung internet ajanga website lapoka züngtetter. Tang ya kaketshirtema kaketrejui maor, saka kaketshirtem aika pei kaketreju nungi online nung internet ajanga conputer nung tesayuba agütsür, anungji pei kidang pei takdang nungi pei class nung adener.Tashidak menaba agi anogo aika kechalenia moudaktsüi nübortem pei kidang shibanga ayur aser dokantema melapokdaktsür, ajisüaka kidang nungi online nung pei nüngdakba jangotsü meshi nunga ki tonga bener arutsür. Taoba putu nung alirtembo bus ticket alitsü asoshia dena anepdang yakta saker NST booking counter nung oagi tapok tilaka nung teka ia ticket alitsü raktepdang yiru saka tanübo bus, train aser tayimtsü ticket alitsü asoshia mapang aser sen talila endoka aotsü menüngdaki kümogo. Joko, ainlen jajaba mapanga taxi gari bushia aotsü menüngdaker saka mobile ajanga dang Ola mesüra Uber taxi service nungi dang asenoki kechikoma gari ka aginer aji ajatsü aser kasa gariji asen tsüng tonga arutsü. Ano tesüngmangtsü aser tajung kaji, tawa March 13 nungi 15 tashi Muslim nunger mongdang ka Delhi nung Nizamuddin ta ajaba tesem ka nung parnok nisung 1800 shi adenshiba rongnung yakanü nisung kar dak Covid 19 tashidak putetba sülen bushisüngdangertemi iba mongdang nung adenertemi amshiba mobile phone number ajanga, hopta ana shi sülena, parnok tenüng aser talidak ajak shitak putetyonga aobaji tesüngmangtsü mapatem ya asütsü. Joko, nisungtemi moutetba tesemi ia computer ajanga nisung ama kümer inyaktsü asoshi yoker. Tang ama nisungtem ajurutepa inyaktsü asoshi mesademi akümba mapang nunga office mapatem ajak internet ajanga online nung dang pei kidang nungi inyaker. Linük nunga lenirtem senden alitsü asoshi züngsem ajak tesem ka nung sentepa külemi mamenyonga pei pei alidak office nung internet ajangasa video conference lia telemtetba agitsü akoker. Tanü putu nung inyakba item ama temelenshitemji zünger mezüngmatsü. Aji oda, gari lenmang yangluba aser kisüjensüba mapatem ajak nung akhi putu yimya nung masü saka nisungbo ishiba saka mapabo tuluba aser tajungba inyaktsü nisngtemi yangluteta inyakba asenoki angur. Item ajakji putu tasenbai bener arutsü temelenshi tajungtem lir. Temelenshi tasen aru shiaji mapa tasen adoker, anungji temelenshi tasen ajanga bener arutsü mapatemji temoatsü aser tajangzük küma amshitsüsa asenok mapatemji inyak metettsüla. Tanü ama asenok tenük agi ngua nisungtem inyakyim ajak nung anogo shia amato temelenshi tasen tasen aruba shiaji mapa tasen bener arutsür. Tetezü mapa tasen aika adoker, anungji tanü putu tasenba nung yabo lanurtem mapa angu melamelar. Tang ama alima tashidak wara tamajung agi nisungtem senzüsenpong mesademi akümba mapang amala yaa, mapa meteta alirtem atemabo, mapa anguba mapangang ka asütsü. Aji oda, iba ama mapang tamajung ya temoatsü mapang ka kümdakja online nung nisungtem nüngdak bener oa tongtsütsüsa inyaktetra, iba kisüng jagi lanur aika mapa angutsü.