Temenen atsüdokba (J. Adok 18)

“Temeranger Kibuba yimti nung asen Tsüngrem yimti nung, onoki angashiba ama onoki nguogo. Tsüngremi aji tatem maka asoshi yanglutsü.” (T. Ken 48:8).
Yisui Pa taküm nung kechi shitak aji maneni meim. Pai kechi majung aji sempa (Ibri 1:9). Tanela Temeshi ain nung Pai tajung inyaka ao, aser nübur tamajungba nungi kümzük (T. Mapa 10:38). Saka Pa tenzükba mapang alima nung tamajung ajakbo matsüdok. Pai Satanji iba ali chuba lir ta ashi (Yn. 12:31; 14:30; 16:11). Yisu sür shia arura, tenyar Yohani alimaji tamajungba kübok lir ta ashi (1 Yn. 5:19). Khrista tanaben aruba nungang tamajungba teti asoshi asüba tsütsüng atemtsü.
Kibuba Yisui Pa bang tangula agi Pa tepsetsü aser Pa aruba jungkai adokba agi Pa tazüngla kümdaktsütsü (2 Tesa. 2:8). Pa arubaji Satan aser Pa anidakertem obendangtsü (2 Tesa. 1:7-9). Shirnoki Pa dak tebang memeseper Pa ain adokba agi parnok samatsütsü (T. Ken 2:12). Satan alener ponglang makaba ongken nung küm meyi ka shibangtsü (J. Adok 20:1-3). Tatem nung Pa aser Pa tenyartem asoshi renemja akaba mipong nung ajungoktsütsü. Parnok idakji anüngdang aser aonung tatem maka kangshia alitsü (J. Adok 20:10). Satan maliba lima ka bilemdangang! Tsüngremi anema raratsü. Satani alima yimsüsürtem anidentsü. Iba dang Armageddon Rara ta ajar (J. Adok 16:14-16). “Külemi parnoki San chanu anema raratsü, saka San Chanui parnok akoktsü kechiaser Pa chubatem madak chuba aser kiburtem madak Kibur lir” (J. Adok 7:14). Temenen aser Tsüngrem memetetba inyakyim dangji Babylon ta ajar (J. Adok 18:2).
Kodang Khrista arur sempet lemdir tagizükertemji masükümtsü aser tereprangertemia tenük memeremtsü! Kotakji tebangkatsü jaka ka asütsü. Tamapur tesü aser tesü pur tama akümtsü (Lk. 13:30). Yimla alir aika idakji mangutsü aser zütoka alir aika idakji angutsü (Mt. 21: 31). Asenok idakji jangrametemi malitsü kechiaser idakji temenen mali! Kechi koma meta!
Talangka nangzüka aliba tajungba anogo anepdang arudaki, Kodang temeshi Tashi den shidak nangri kangdir, Tai ajungtoktsü; Kodang Tsüngrem Kibubai tanüngba angashidir, aser Pa teka alima ajak madak milungi ochiba den songtokdir!
(Robert Lowry, 1826-1899).