TEMENEN INDANG YISU TESAYUBA

– R. Temjen Imsong (Ex-Pastor)
Naga United Village, Dimapur

1.    Kibuba Yisui ashi, Nenok pei tebu Mojing meyong lir, Aser nenok Tebui jangraba enyaktsü nenoki mulunger. Pa tetenzük nungi nisung tepseter liasü, Aser Ochi nung menokdak, pa dak ochi mali, kechiaser pa tiyazü ajak tebu. Yoh.8:44.
2.    Yisui ashi, Shibai temenen benshidir pa temenen lar. Yoh 8:34. Tsüngrem O i ashibaji kodang nisung kadi temenen benshidir, pa temenen lar  akümer, pa temang, tanela, shisatsü, ajunga temeneni alena ayur.
3.    Laishibai ashir, Mark 7:21-23. Kechiyong telunglen temulungjang nungi shisatsü tamajung adoker. Jabujari, Auyaba, Nisung tepsetba, nüktapangta, Merumeruba, Jakla Tamajung, Tekülak, teseplep, tenük meremba Tsüngrem atalaba, asüküm, tamaji, item tamajung ajak telunglen nungi adoker. Aser item yagi nisung menentsür. Nisung shiba temenen lar küma alena lir, pa taküm ajunga temenen dang akümer, aser iba jagi alima ajak menentsür.
4.    Yoh 4:29. Alima temenen bener aoba Tsüngrem San-Chanu ajiang, Nisungji temenen lar, pa taküm shi azü yimya ajungaji temenen dang küma adok, nung nisungi peisasa kumzüktsü makok. Anungji alima temenen ajunga bener aotsü Yisu alimai aru. Pai alima junga temenenji aben, pai parnok dang ashi, nenok ajaki ya jemang, kechiaser yak u tezungzüktepba azü koba jendipur temenen adoktsü asoshi tokshi. Mt.26:27-28.
Alima meimchir temenen shidoktsütsü asoshi Yisui pa Temeshi senti azü tenlaogo, iba Temeshi San-Chanu azü nung ne temenentem shidokogo ma ?
5.    Laishibai ashir, Mt.9:6. Alima nung nisung chir dak temenen adoktsü asoshi tashi, aser ain alir ta metettsü. Pai Togimra agi shirangba dang ashi, “Shishiang, aser ne yipden bener kidangi oang.”
Yisu dak dang alima nung temenen adoktsü ain aser tashi lir, anungji pa dang alima kümtetdakba.
6.    Ni nenok dang adangji ashir, ni ao-nung nenok asoshi tajungba aser pa kodang arudir, pai temenen indang, Temeshiba indang, O bendangba indang, Alima nung teti kuli agutsütsü. Yoh. 16:7-11.
Yisui ashi ya renemogo.Yoh.19:30. Tetzü:- Pai temenen abenba, Temenen sentsü aoba, Temenen tadok atema, Pa azü tenlaba agi teti asoshi renemogo ta ashi. Aji saka meimchirtem temenen agi tenuk tapok, Temenen agi shisatsü alenbanga lir. Saka Tanela temeshi nisung ka tenük lapoktsü aser tesama jenjangji ngudaktsü. Anungji Yisui pa aobaji tajungba ta ashi. Kechiyong pa orr külen, Tanela Temeshi parnok dangi arutsü akok ta pai ashi, Yisu dangi anitsü asoshi Tanela Temeshi asenok yaritsü.
7.    Mark. 3:28-29. Yisui ashi, atangji ni nenok dang ashir, Nisung chirtem temenen ajak parnok dangang adoktsü. Saka shibai Tanela Temeshi ataladir kodanga tadok maka. Alima temenen ajak, Tatalaba jak, nangzükrabang adoktsü, saka nisung shibai Tanela Temeshi atalaba temenen jibo, iba lima nung süshia, tarutsü aliba lima nung süshia tadok maka.
8.    Laishibai ashir, Mt.6:9-12. Anungji nenoki yamai Sarasademang, “tatidangi onok tanima, Joko tamajungba nungi sotang.” Alima temenen tashi akoktsü asoshi anogo shia Tsüngrem dang temulungjang taroktiba nungi sarasademtsüla.
Tsüngremi ne tai medoktettsüsa temenen kar ali asü ? Laishibai ashir, “Nenok tebelemer aser khuret abener ajak kü dangi arung, Ni nenok nem anisungzük agütsüdi.” Mt.11:28.
9.    Luk.24:47. Temulung meyipba aser temenen tatokba Pa tenüng nung sayutsüngitsüla. Temenen tadokba ya Yisu khrista kangki ajanga sempet lir. Iba teimla osang tajung kin ajak tang sayutsüngitsü aser sayutsü Yisui ozüng agutsü.
Yisui ashi, “kü dak liang aser ni nenok dak alitsü.” Yoh. 15:4-5.

You must be logged in to post a comment Login