Temenen madak Tsüngremi tajung inyaker: Justin Bieber

Manchester, June 6 (Agencies): UK kübok Manchester yimti nung Ariana Grande indang kenten sentong nung kiralongrartemi bomb pokdaktsüdang nisung 22 pokset aser aika yirutsü.
Iba lendong atema Manchester nung alirtem den alimai Deobar nikongtsütsü tasürtem mangyimba aser tetushi agütsüba sentong ka agi.
Iba sentong nung Ariana Grande den Katy Perry aser Justin Bieber nungeri “One Love Manchester” kenten sentong nung shilem agia liasü.
Küm ana tejakdang pop kentener Justin Bieber-i pa Khristan tamanger ka ta yimjak nung metetdakja liasü aser pai “One Love Manchester” nung adenertem dang teimla indang osang sangoktsü.
“Ammang tia nung alidanga Tsüngremi tajung inyaker. Temenen madak Tsüngremi tajung inyaker. Na kechi tia ka nung lidir liaka Tsüngrem nü den dena lir aser Pai na meimer aser Pa yangi na atema lir” ta Justin-i tesentepertem ayongzük.
“Iba lendong nung taküm samartem nem nia nenok den külemi tetushi agütsür. Onoki nenok meimer. Takoksa ajuruba kibongtem dangi onok temeim lemsateper. Onoki taküm samartem tushir aser meimer” ta paisa shisem.
Taoba hopta tu Justin Bieber-i Instagram nunga “Ni Yisu sülen anidaker” ta osang metetdakja liasü, ta CBN News ajanga ashi.