Temenen

Laishiba nung temenen tetezü balala amshiba angutsü. Mezüngbuba temenen tetezüji bushidi süra ibai atongtsü tim ajioka ayuba metongtetba (missing the mark), tebilemba mesüra mapa nungi tajung matokba, tajung agutsutsuba nung tamakok anguba. Tejen Lai nung Tsüngrem den aser pur medemsortem den tesendaktep shidak meyutetba dangji temenen ta aja. Iba teratettsübaji tezüngzüktepba agi sayu. Metetta aser memetetti iba tezüngzüktepba raksabaji lokti asoshi lendong ta züngshi. Temenen shia jagi tangar den aser Tsüngrem den tesendaktep nung teraksa adokdaktsür aser pei dak aser tangar dak timtem adokdaktsür ta angatetta liasü. Shibai temenen menar pa/la dangi iba taa timtem arur. Yob kaket den iba tangatetba medemdangra ya shidak ta ashitsübaji tasak ka lir. Yangi kija taküm timatemba tebilemtsü rasaa ashitsüji tamakoktsü ka angur (Yob taküm otsü reprangdangang). Aji saka, nisung dangi timtem aser tejashi arubaji nisung tsükba nungi nisung temenen ajanga arur ta Laishibai sayur.
Temenen indang tesayubaji Tasen Lai nung peria sayur. Ozüng aika agi ana dang aküm: Tsüngrem meimtsü aser kiyonger dang meimtsü.
Temeim ozüngji temenen masü ta Yisui sayu. Iba jagi Yisui Farisitem aser Tezülurtem anemsü aser ozüngyim aitsü. Parnoki ozüng ajak aibilen mesüi amshitet, saka Tsüngrem aser kiyonger memeimba jagi shidakba temeshiba mangateti kümdaktsü.
Lipok 3 nung Eden nung nisung tsükba aser Tasen Lai nung Pauli ibaji amshiba jagi temenen tetenzükdak aser iba nung adokba sayur. Pauli meimchir temenen aser Adam temenen den yimya raksaba metetta liasü. Adami metetbaji nisung shiai metetta lir. Tsüngremi asazüktsüba magizükteti pai pa tashi agi akoktsü ta bilema Tsüngremi asazüktsüba atena oa tashi mangai techi ta ashiba süngdong nungi achi. Ibaji ajanga pa Tsüngrem taküm tetezü akaba adokdak nungi leptok. Arogo otsü nung Adam aser alima kin tesendaktepji tesashi Theological onük ka aküm. Kari ashir temenen yimya aser temenen aibelenji otsü- apung medemba ajanga meimchir ajak dangi prokshia ao. Kari ashir nisungji temenen nungi nüji saka ajizüktepba ajanga Adam mapang nungi ajaki temenen menar aru. Adam menen ajanga meimchir ajak Tsüngrem tsüngdang aibilenba taküm akümer ta Pauli tesayuba mali, saka meimchir yimya nung teraksa keta lir aser aji Tsüngrem dang tashi anga melenshitsüla ta pai sayu. Pauli asen tenüklen nung ozüng aliba teti jembi (Rom 6:13-14; 7:21-23) aser shi (Rom 7:5-8;13; 13:14; Gal. 5:16-21). Pai temeshi alitsü jangruaka temeneni mesüzükdaktsür. Asen temulungjang nung tamajung bilemba ali shi temang keni tamajung ta pai mesayur (Gal. 5:19-21); saka pai Tsüngrem Tanelai aniba malir teyangluba asoshi jembi. Iba shi yimya ya teraksa lir aji asünung ozüngji temenen meinyaktsü atema ayu saka temenen menatsüba lemangang kümdaktsür (Rom 7:7-8).
Ainkartem aser mezüng Khristantemi sayutsüngibaji temenen nungi temulung meyipa taküm junga alitsü indang sayutsüngia liasü. Asenok temenen nungi kümzüktsü asoshi Tsüngrem nisung aküm (Mat. 1:21; 9:13; Luke 19:10; Yn. 1:29) aser tamang ajanga kati temenen pungiba Khrista azü nung shidoka temenen tatokba angutsü akok ta osangtajungi nangzüker. Nisung dak tajung aliba agi tatok agütsü masü saka Tsüngrem taochi agi tatok agütsü. Taochi tali akatsü asoshi asenoki iba taochi meketmeseni yutsütsüba masü (Rom 6:1) saka temenen mapatem nungi pilaa temeim taküm alitsüla. Asenok yaritsü asoshi ozüngji temeim agi benshitsü Pauli tesayuba agütsü (1 Kor. 5:9-11; 6:9-10; Gal. 5:16-21; 1 Tim. 6:4-5; 2 Tim. 3:1-7). Iba den tashi maitba adianutem metsüdaktsüsa asenoki kecha meinyaktsüla (1 Kor. 8:7-13; Rom 14).
Laishiba temenen memenai alitsü aser temenen menaa aliba indang jembir. Iba shi nung asenoki temenen madak tabensa takok ngua alitsü kodanga makoktsü ta sayur (Rom 7:24-25). 1 Yohan nung shidakba Khristan katibo taküm nung temenen memenar ta sayur (1 Yn. 3:5-8; 5:18-19). Saka 1 Yohan nungbo shibai ni temenen mali ta ashir pa tiyazür lir ta ashir (1 Yn. 1:8-10). 1 Yohan 1:3 aser 5 nung tezulur osang ji Khristantemi tetemjen alizüng atongtsü merangtsü osang zülu saka 1 Yohan 1:1 aser Pauli shidakba tiaji sayur.
Oba, temenen lima nung temenen memenai alitsü Ne taochi teyari kü den liangma. Amen.

You must be logged in to post a comment Login