Temerük aser temulung raksa : T. M. 2:37-47

“Tashitemetet akasangi tanela anir arur” (A. Shin 11:30).

Alima nung mapa tulutibaji tanela anir aruba mapa lir. “Kechiaser nisungi alima ajak ajangzüker pei tanela samadokra, pai kechi ajangzüktsü?” (Mk. 8:36). Alima tanela anir arubaji shisa takatiba mapa lir. Shirnoki temeshiba dangi jenti meyipdaktsüdir parnok petinutem ama teti tatem maka alitsü (Dan. 12:3). Tanela anir aruba mapaji tepelatiba mapa. Sannükeri tamatokba san angudang kecha dena medemdangtsü mokoki tepela liasü (Lk. 15:5-7,10,23,24). Tanela anir arubaji tematiba mission meimchir nem agütsüba lir. Kechiaser osangtajung tenyaba mapa nung Tsüngremer tongti tenyar asüba dak alema koba temaba ali? (2 Kor. 5:18-20). Khristan mapa nung tesatemtiba mapaji tanela anir aruba mapa lir. Khristani iba mapa meinyaktettsüsa koba meta lir?

Sayutsüngiyim mapa nung mezüngba aser tongtipangtiba meraji jembiba ama inyaktsüla, kuli asütsüla. Khristan yimsü atema notaker tajungtibaji Khristantem lir. Saka, Khristan yimsü anemer tashi taitibaji Khristantem lir. Asenoki kechi ashir aser koda alir anaji puteptsüla. Tanela anir arurtemi Yisuji temenen nungi kümzüka melira mesüra pai temenen madak takok ngua melira, ibai lemtsü nung khu (hair) tanak mozü atepba ama asütsü! Paul taküm temerük aser osangtajung osang tejangja agütsüba ajanga teraksa governor atentendaktsü (T. M. 24:16, 24-25).

Atangji iba tetezü pa/la tabensa maküm tashi atatsüla ta masü. Tümo milen kati tesadang ka rongrong sangwatsür ta masü. Masü, iba yagi tsüklokli nungi tesangwa agütsür! Iba tetezü, tanela anir arur ka temenen odang alitsüla ta masü. Pa Tsüngrem aser nisung matsüngdang ochi shia alitsüla. Kibuba asoshi pa temeshitet marok ka asütsüla (2 Tim. 2:21). Ango puri pa zütsük matepshiba mapang endokba dang akümer. Tzüyimi maodang tama parnoki zütsük reprangshimer. Yamaji asenoki Laishiba bushiba aser Tanela ashiba angaa asenok taküm teti bushitsüla.

Tanela anir arurji sannüker lir. Pai santem prokshia aliba sülen aor aser samaa alir bushitetta anir arur.  Pa ajungmesodaktsübaji aria bilembaji lir (Mt. 9:36). Iba jakla nungi pilatsü makok ta tangatetba agütsüba ji Yisu shia arur külen pai Peter dang asemben tashi “Nai ni meimer asü?” ta asüngdangba nungi angatetter (Yn. 21:15-17). Kibuba meimba aser samaba purtem tanela anir arur mapa lir. Asenoki asen ama asen kiyonger dang memeimra asenoki parnok molumi lendong nungi kümzüktsü makok. General William Booth (1829-1912) Salvation Army ngutetsangi ashir, Tanela anir arur shiai molumi tetsübutsü mangdangji akatsüla. Takar nisungi molumi nungi Lazar dang pa adianu pungu molumii marutsü temulung meyiptsü ashitsü Lazar alimai yoktsü masüngdang na? (Lk. 16:27, 28).