Temesepba chiyungtsü mamshitsü ajungshiba anogo takok ngua mungogo

Dimapur, May 10 (TYO) : Temesepba chiyungtsü ajanga nisung taküm shi aser tanela ajak tesama tia-i anir. Iba mapa tamajung ajanga tamanger lokti ajak nung teraksa aser tamakok angur ta meteta, kanga nentaka, küm aika iba anema rara-a aser tesayuba jenti agüja, sentong balala ayonga agidaki.
Taküm küm ABAM Social Concern Luden ajanga “Temesepba chiyungtsü mamshitsü ajungshiba anogo May 10 nü amongtsü lemtet, ta ABAM Women Ministry Secretary, Mrs. Alemla Mozer-i sangdong ka nung metetdaktsü.
“2011 Mungdang nung asen lima nungi küm ter (10) tsüngda nung yi samatsütsü asoshi tamang agi lemteta ayu. Iba nükla nung sentong balala inyaka arur joko küm pungo (5) buba lir. Aor tamanger kibong ajak nung 4:30 – 5:00 ako tashi temesepba chiyungtsü anema sarasadem mapang agi. Arogo nung Full-time tenzükertem Chapel mapang iba atema sarasadem agiogo. School balala nung chapel mapang temesepba chiyungtsü atema tekümdangtsü tesayuba agütsüogo,” ta laisa ashi.
ABAM-i den yaritepa Mokokchung Administration aser Mokokchung Municipal Council-i tanep nungi nikongtsütsü 1:00 ako tashi Mokokchung jila nung moko-sali ayokba dokantem ajak shibangtsü tetuyuba agüja iba sentong takok ngua kaogo.
ABAM nung tenzükertem, Rev. Dr. Mar Atsongchanger, Executive Secretary-i anir Mokokchung Town area nung pamphlet aser leaflet ajak nung yi anema tesayuba balala Laishiba nungi zülur Dokan/Office aser Town nung senzürtem nem agüja senzüogo.
Tanü ABAM staff-i Jubilee Memorial School Mokokchung semdanga liasü. Iba mapang Rev. Dr. Mar Atsongchanger-i, kaket shisatsü bushiba mapang lanur ka taküm nung rara jenti ajurutsü. Item raratem rongnung “temesepba chiyungtsü ya ka lir. Taküm nung takok ngunera item nungi jenang” ta Laishiba nungi kaketshirtem ayongzüka jembi.
Temesepba chiyungtsü mamshitsü ajungshiba anogo Imlong Place Mokokchung nung külemi Tsüngrem nem tenüngsang agüja sarasademer tembang.