Temesepba mozü ton 50 nguteta raksatsü

Mexico City, Luroi/August 18 (Agencies): Mexico nunger marine temi Rogonü Sinaloa state yimtiba tezülen tenem ka nung ali telung nung temesepba mozü yangluba lab ka nguteta methamphetamine mozü ton 50 raksatsüogo.
Itangitertemi state yimtiba Culiacan tezülen Alcoyonqui municipality telungtet nung ozüng alema benshiba temesepba mozü ton aika adokdaktsür ta osang tejangja ka agütsüba sülen Marine temi iba lab ya ngutet, ta navy ministry sangdong ka ajanga metetdaktsü.
Ministry ajanga noksa ka agütsüba nung marine ana hazmat suits semer plastic container tem ishika asadangba angur.
Osang ajanga ashiba agi, temesepba mozü tem ya ali telung nung tesem ana nung meima liasü aser iba den meth yanglutsü atema chemicals tem barrel nung yua aliba ngutetogo. Iba tesemi oli oratsü tasak asüba ajanga temsepba mozütem ya iba tesem nungsa rongtoktsüogo, ta ministry sangdong ajanga metetdaktsü.
United States-i methamphetamine supply asür rongnung mexico ya tongti ka lir heroin shibelener tongtiba lir, aser iba ajanga opioid addict akümer aika kümdar. Maneni iba linük ya north nung cocaine shibelenba lenmang tongti ka lir.