Temeshi aieni aoba

Alima nung tamangba yimsü shia temeshi ta züngshitsüsa tongtibang tesem balala lir. Item rongnungji Muslim nungertem asoshi taküm nung kenbosa Saudi Arabia nung aliba Mecca yimti nung oagi sarasadem mapang agitsübaji lir. Iba temeshi aieni aoba dangji Arabic o agi Hajj ta ajar. Aji oda, Muslim nunger shirnok Mecca tonga temeshi aieni moutetter, parnok nisung shiai parnok melen karbosa yoktsüla ta asüba tangatetba nung parnoki inyaker. Muslim nungertemi temeshii aieni aoba mapa ya Abraham mapang nungi tenyartemi ashiba ama inyaker ta amanger aser alima ajunga nungi Muslim nungertem sentepa külemi tsüngrem külembaji parnok asoshi kanga tongtibang mapa ka lir. Aji oda, küm shia alima tesem balala nungi Muslim nunger lakh 20 shi Mecca bushia temeshi aeini aor. Item temeshi aieni aortemji Saudi Arabia sorkari anepalur. Ajisüaka, telok ulura nungji aiben jabangmeyimtet lendong adoka nisung asüba osang angashir. Aji oda, India nungia küm shia Muslim nungertem Mecca bushia temeshi aieni aotsü asoshi center sorkari senotsü teyari agüja yoker. Ibaji India nunger Muslim purtem asoshi teyari tuluka lir. Iba ama kasa teyariji Khristan purtem nema Yirusalem, Bethlehem aser Sinai tenem tashi oa külemer arutsü asoshi sorkari senotsü teyari agütsütsüla ta Karnataka nung Khristan-temi par state sorkar dang akangbaji  nüngdak shitak ka asüngdangogo ta angatetter. Aji oda, Karnataka nung Khristan purtemi par sorkar dang parnok nema küm shia temeshi aieni aotsü asoshi teyari agüjang ta meshiba  ama India nung Khristan purtemi center sorkar dang küm shia Muslim nunger nem agütsüba ama teyari agüjang ta meshitsü nüngdak ka teyur. Muslim nunger asoshi temeshi yimti Mecca bushia aoba ama, küm shia Khristan-tem alima tesem balala nungi Yirusalem bushia  aor. Itemji temeshi  aieni aortem lir. Aji oda, Nagaland nungia küm shia Israel limai aoba osang asenoki angashir. Naga nunger balaka ajak amato Khristan lir, anungji parnok asoshi Israel lima tonga oagi Yisu Khrista senzüba yimti aser ayong ajak repranga sarasadema senzütsübaji tanüla tsütsü jangratemtsüka lir. Iba ama temeshi lima semdanga sarasadema jajaba agi tamang ulushir aser tasü aiter. Talisa sayutsüngirtem aser arogo nung toklang tenzükertembo akok tashi arogoi parnok ajakji küm shia kakabosa Israel limai odaktsütsü merangtsüla. Ibaji  ozüngsa merenemaka ajungshiteptsü asoshi ABAM nung pangzüng ka ama renema ayutsüa akok. Atangji, Israel limai aotsübaji arogo ajakibo meyoktettsü saka aotsü ajungshitepra iba jagi aika otettsü. Aji oda, sayutsüngir kati Yirusalem, Nazareth, Bethlehem, Kanan, Capernam aser Sinai tenem nung senzüdanger külen aser Galil aser Yordan ayong nung ajemokdaker külen sayutsüngibaji kenyongi balaka asütsü. Iba tangatetba nung akok tashi asenok Khristan purtem Yirusalemibosa otettsüsa center sorkari teyari agütsüra, iba jagi amangba purtem aika temoatsü angutsü. Atangji, Muslim nungertemi Meccai aotsü atema center sorkar dak kija metaloka malir saka kechisüdirsüaka taküm nung kenbosa Meccaji tonga  temeshi aieni aotsü atema akok tashi senotsü aar aser aji bendena yur iba jagi Meccai orr arur. Iba amaji asenok Khristan purtemia kechisüdirsüaka taküm nung kenbosa Yirusalem tonga orr arutsü tebilemba nung mapa meranga inyaka senotsü bendentsüla. Israel tonga orr aruba nung sen lakh ka shi dang endoktsü aser aji mapa inyaker atemabo aika masü, anungji melamela bendentettsü. Ano, tanü asüngbo Israel tashi anir orr meyipa anir arutsütsü pur telok aika lir. Item rongnung telok ka tenüng agi Tribal India Initiative ajanga Israel Ministry of Tourism nung tashi ketdangser anir arua arogo lenirtem den lenmang sayua shisalemsatepba sentong ka agiogo. Temeshi aieni aoba mapa yabo Muslim nungertemi dang masü saka Hindu nungertemi dena inyaker. Hindu nungertema küm nung kenbo parnok temeshi yimti nung nüngtugu tenla ki bushia orr tekülem mapang agir arur. Iba atemaji parnoki senotsü balaka bendena ayur. Iba amaji asenoki inyaktettsü. Muslim nunger   kati pa taküm alidang Mecca tonga moutetbaji tamakok tuluka amato bilemba ama asenok Khristan purtem asoshia taküm nung Yirusalem tonga moutetbaji tamakok tuluka amato bilema aotsü merangtsüla.