Temeshi Lai Putishirtem Tia

~ T. Imo Jamir.

Iba lima nung nisung ka nüji kümteta pai metetba tangar dang sayutettsüsa kümtettsübajisa tasakba, tetezü iba atema kümsa-küm, mapangsa-mapang agia taji ajak petoka rongsensa rongsen lalur ang tongtetba nükjidongji ibai lir. ABAM-i Mongdang ketbok inyaker toklang tenzükertem ajak küm taktakzük jungerbo mapa nungi anentsüba temzüng renema amshir.Iba inyakyim nung ya kanga junga shisadangtsü keta lir ta bilemer.Government aser Company mapa nung retired asüba ya kecha apitsü mali kechiaser itemla organisationstem yabo alima anogoshia melenshia aoba den tsüngkang metema aotsüsa akümer anungji itemla nung inyakertemji upto date mesura iba loktiji akoksatsüsa anungji koba retirement age lateta lir aji tim dang kechiaser inyakertemji alima tsüngkang den atongsemer aoer.
Tsüngrem-oji- “TETENZÜK ASER TATEMBANG ( Alfa and Omega) ano kasaji, iba Kaket nung zülua aliba rongnungi,’SHINGAIA TAJENTO MESURA TASÜTO KATA INDOKTSÜ MESURA INOKSEMTSÜ MAKOK’ aji Temeshi Lai O.Anungji Temeshi Lai luyim wadang nung teinyaktsü ajak agi Lai tesayubaji shitakba nung arokaroka ratettsübaji dang lir.Nisungji kodaka tain kümdir padakaji shisatsü nung terenemba, taremzükba aser terajemba akümer,shirnok küm nung tanobur südir kasaji shisatsüji tetokdak asütsü. Asen Aorbo shisatsü nung ano dangang terenem leni aruba mapang shitak nung mapa nungi anentsütsü. Secular nung graduate sur,theology B.D., M.Th aser Doctorate züngtem tashi nung tasoba küm kwi apensar alir ta bilemer ?? Ano iba degree benerang tenzükba nung küm 15-20 bosa bendanga tenzüktet nungang Reverend bo nguteter. Sura parnoki metetba aser parnoki ajangshia aruba shisatsü taroktemji arogo aser nuburtem ajangzüktsü atema amshitsü mapang mali ajagi nuburtemsa akoksatsü. Ya alima aser arogotem atema kangasa tesasatsü ta bilemer. Ni theologian masü saka asen Aor terenemtet tashikar Reverend aser Doctorate ngur alirtem parnoki bena aliba shisatsü tarok den ano jembitsü sempet pokraa bener pei pei kidang moka kazütsü idangji tangar kinbo kasa par pangertem nungi parnok shisatsüji agia .arogo aser alima yanglutsü.
Nisung ka kodang mapa nung retired südir pa dakji sentsü ajemer anungji,pai kodaka meteta lidir liaka, komaka tsüngrosonga jembidir jembiaka pa oji manangtsü.Local Arogo kari kanga apayuba agi pastor küm taktaktet dak tali inyakra paji alima tsüngdang temzüng anema inyaker ka akümer.Temzüng anema inyakba kati sayutsüngiba nungji temoatsü angu melena pa dak nubortemi tai ang ajitettsü aji alimar yimya.Alima nung miemchirtem temeyong memetem ama tetsüi asoba nisung shia taginüba aser tejangra shisatsü balala, ajioda alima nungsa alir asünung toklang tenzüker suaka pa/la den opang mapurjiasa lir, anungji küm taktaktet apensaba anogo nung tenzükba mapa nungi manenra tesasatsüka pai tenzüka aruba mapa tajungtem ajak amajok kümtsütsü.Nubori apayuaka aser paia tenzüktsü jangraa liaka temzüng anemabo metenzüktettsü kechiaser TEMZÜNG/OZÜNGJI TENÜK TAPOK.
Temalen zülusemba ama alima melenshiaka Temeshi Lai Obo alima tenzükdang koma liasü alima tatem danga kasaji kecha temelenshi makai atemtsü. Shibai koda tapensa-ba nung Lai o-i aginüba ama taroktiba rateter itemla jiang Temeshi Lai luyimba nungbo nungdaker. Arogo mapasa suaka shirnok administration/teaching etc nung sotaka lir parnok atemajibo retirement age lateta ayutsübaji tim dang saka shirnok Lai sayuba aser sannükba nung sotaka lir parnokjibo pai tashi agi koka pai jangraa tenzüknu tashi aser nubortemi pa nubo aginua ali tashi tetsükdak makai tenzüktsü lenmang sadem lapoktsütsü tim kechiaser zülua aliba ama , KOPOAPUR KOLAKJI SENTSÜWANGSHI KORANG anosa ‘ PAI TAMBURTEMI ASHIBA /SAYUBA SENTOKADOK’. Taintemi sayuba sentokadokba jagi Isreal yimli kechi aküm ??? Taintem shisatsü meteniang arogo aser alima meyanglutettsü !!!(parnokji shisatsü tzübokdak/longzük)
Taintem shirnok dak Temeshi Lai Oi aginüba ama Tsüngrem O tabensaba nung rateta joko par kibong atema khuret kecha maka sur mapa ajak agi kibong ajak bendanga agüja tenzüktettsüba purtem shisatsüji metenra arogo aser alimaji tetokdakba-tetokdakba, rongsem meimba, moromoro ,mokokachi aser ampangyim agi asüngtsü aser tamangba tsütsülena emotional dangashi tamang nung tera meyangtettsü idangji Lai O nung takotet Reverend aser Doctoratewala temji pa atema platform maka nung nüktzü aneta tamangertem tamang temsaa aobaji repranga alitsü tia makara tamang agi maniba arogotem nung teraksa atoka Mongdangjia tilaba akümtsü shibaibo shitet.
” Yihusua-ia tambur kümer ang Mosa mapa melenzüka nuburtem tenzük masü no !!”
Kü Tangatetba-” Temeshi Lai luyim wadang nungbo tasoba küm masü bendanga agüja Tsüngrem O taroktiba nung teratet agütsüteta tamangertem tera yangtetdaktsütsü pur jiang ajak dang tematiba.”