Temeshi mapa ketdangsua inyakdang nendak-nendaka inyaktsüla

~ L. Kika Pongener.

Tsüngrem tenzükba wadang nung taküm tepiyong tenzüktsü atema “Tenzüker” ka balaka shiteta bendanga ayuba (Ordination) inyakyim ya kanga dang tasüngtet aser ‘Temeshi Mapa’ ka lir. Aji oda, temsua aliba tenzüker ka arishi tepiyong Tsüngrem tenzüktsü atema arogo-i balaka shiteta bendanga ayuba mapaji Baptist tamangba yimten inyakyim nung kanga tongtipang mapa ka asütsü. Atangji Tsüngrem tenzüktsüba mapaji alima mapa nung tenzüktsü bushiba aser shimtetba ama mebushir aser meshimteter, saka kanga anemponga, asüngteta, ret-reta shimteter. Anungji iba Temeshi Mapa atema tenzüker ka balaka shiteta ayutsüba atema arogotemi mungdang dangi kulisua ‘Recommend’ asüdanga kanga pongpa-pongpaa magitsüla, saka ret-reta agia inyaktsü kanga tongtipang.
Ano mungdang aser arogo-i iba “Temeshi Mapa” ketdangsua inyaktsü nungloktsüba purtemi, pongpa-pongpaa, kuli kuptok, oda mela-mela mapa atemtsüba asaa masü, saka kanga kümdanga, khuret bena, mapang endok mesasai inyakyim ajak abensaa inyaktsü kanga tongtipang. Talisa ‘Ordination’ inyakyim amala nung mungdangi lateta akaba inyakyim nung, tarutsü nung tetsükdaktsü malutsüsa ret-reta abensaa inyaktsü kanga dang tongtipang. Mungdang aser arogo-i inyakba mapa nung tezülen nungi kecha tashishitsü/tajitettsü meli-i inyakra, aji alima nubur matsüngdang tatishitsü tajung asütsü. Aji oda, iba ama Temeshi mapa inyakdang, tia mekai-ka alima tensa mapang agi sadem-sadema inyaktsüsa memelara, mapang tatsüka atsüzüker, alima tensa mapang junga kümer kulen sadem-sadema abensaa inyakba-ang tajungtiba asütsü. Laishiba nung lipok otsü nung züngdangra, kenu anogo Tsüngremi Abraham dang, “Ni na kin tulu ka tebu kümdaktsütsü” ta azüngashia nangzük. Saka Abraham-i ni senmanger malinung aji kodaser ataloktsü ta langzü. Anungji Tsüngremi tena tsüngda nung tezüngzüktepba ka yanglutsü asoshi küm asem tain Nashi tsüla ka, Nabong tetsü ka, San tepung ka, Guduru ka aser Posu chanu ka ta bener arutsü ashi. Ajiser, tenladak sabang nung tarungba tenla agujang ta ashi.
Abraham-i Tsüngremi ashiba ama ajak bener arur shiruru ajungaji anük-anüka lepsa aser shilem shia balala ayu. Ajisuaka, pai Guduru aser Posu chanu jibo melepsa rangben dang ayu. Ashiko tila-teri dang’ar kecha masü’ar ta sur melepsa sudi, saka aji tenladak sabang (Altar) nung ‘Tarung Tenla’ agutsüba inyakyim nung mabensai inyakba ka liasü. (Levi-1:14-17 nungji züngra tenladak sabang nung Guduru aser Posu chanu koda tenlatsü iba indang tejangja shia angutsü). Aji oda, Abrahami Goduru aser Posu chanu melepsai rangben dang tenladak sabang nung ayubaji azümesena, züba-zübaa, yakta mapa atemtsüba asaa inyak sudi. Iba sulen Abraham khenpiga ayipjanga sumanga mejanga ao, aser mangdang nung ammang tulu tetsübutsüka pa madaki aru. Aser Kibubai Abraham dang ashi, “Ya metetang ne semchirtem, parnok meyong masüba bendanger lima ka nung küm noklang pezü tashi alar sua kanga mejungi timtemdaktsütsü” (Lipok-15:7-13). Ashiko, Abrahami tenladak sabang nung inyakyim abensaa masü, saka züba-zübaa pongpa-pongpaa mapa atem asaa inyakba mechi par semchirtem Ijip lima nung küm noklang pezü dak tali alar tia nung alitsüsa aazük sudi ta bilemer. Atangji, mungdang aser arogo nung Tsüngrem tenzükertemi, mungdang aser arogo-i nungloktsüba “Temeshi Mapa” inyakdang, lateta akaba inyakyim nung tera-ka zübazülema, pongpa-pongpaa inyakra, alima matsüngdang dang masü, saka Tsüngrem tsüngdanga sentsüh tulu asütsü ta Abrahami inyakba mapa nungjagi asenoki lesson angur. Atangji Tsüngrem tenzükertemi mungdang aser arogo nung ‘Temeshi Mapa’ (Ordinances), ‘Ketdangsuba Mapa’ (Stewardship), aser ‘Nutsüngsuba Mapa’ (Discipleship), yamala mapatem inyakdang kanga kümdanga, nendak-nendaka inyaktsüba indang iba laishiba nungi asenoki tekümdangtsü lesson tajung ka angur. Aji oda, local arogotem-ia ‘Ordination’ mapa yabo pongpa-pongpaa mesui kanga ret-reta agir mungdang dang-ia abentsüla. Ano mungdang-ia arogotemi abenba ajungaji pongpa-pongpa mesui kanga ret-reta agir, kanga junga asadanga tendanger dang inyakra, iba ‘Temeshi Mapa’ ya Tsüngrem tenzüker shirnoki ajangzüker parnok takümji Tsüngrem aser nisung matsüngdang kanga dang merataket aser akümtaket asütsü.
Anungji Tsüngrem’er wadang nung nungloktsüba ‘Temeshi Mapa’ inyakdang, tezülen nungi ashishitsüsa kuli kecha makatsüsa kanga dang kümdanga aser nendak-nendaka inyaktsüla. Ano item dak alaka, Tsüngrem’er wadang nung tenzüker/tenzüklatem, kong/kechi wadang nung tenzükdir tenzükaka, taküm asüngteta aliba, kibong nung apuani aser chirnur tamang liromedema tangar tetsüng memettsütsüsa, inyaksangshi, jembishinu, libaliro ajak nung tazüokba, taremzük aser ajemaluba taküm, arogopurtem nungi kuli tajung agutsütettsüsa aliba taküm aser kibong asütsü kanga dang tongtipang lir. Eli Putir-i par chirtem mazüoktet, par jabasotemi tenladak sabang nung Putir meyong/shilem osettsüset nung tashiyim amshia tesempatsü mapa jenti inyak.
Ano aji dang masü, Eli-er jabasotemi tekulemdak sentep suki kikümbang nung tenzüker tetsürtem den nüktapangta benshi (1Samuel-2:12-22). Atangji Tsüngrem’er wadang nung tenzükertem kija taküm dang masü, saka apuani aser chirnurtem ajunga tamang liromedema litetra amangbapurtem matsüngdang tatishitsü tajung asütsü. Iba ocet ya mungdang aser arogo inyakyim nung aibelena inyakba ka metongshitsüba olen masü, mesura tenzüker kar dak rangloker masü, saka tarutsü nung ajak ajungtsü asoshi nendak-nendaka inyaktsü atema ajongshiba olen ama tazüngertemi angateta züngdaktsünur.