Temeshiba arishiang – Rom 14:19

Tanela nung tain akümba temaitsü kaji tangar süneptsütsü aser tashi itdaktsütsü asoshi pei tesünep tenlatsü mulunga alibaji lir. Pauli yimjung zeintsü mapa dang arishitsü aser tangar yanglushitsü lemang dang bushitsü ajungshia zülu.
Arishiba tetezü kecha agia matsüitdaktsüi alizüng tonga aotsü merangba. Ibai aoksa inyakba mapa masü. Iba nung yimjung asoshi aser tangar yaritsü asoshi Tsüngremi agütsüba ajak dena lir. Pauli Kolosi arogo dangi Khrista nung nisung ajak tabensa kümdaktsütsü meranger ta zülu (Kol. 1:28-29).
Paul asoshi Khristantem yaritsü shimtetba tetezü koba mapa agi tangar metsüdakdaktsür iba mapa nungi pilaa alitsüba. Pauli pa temeden aser tesünep indang mebilem, saka pa tebilemba tulubaji tangar tashi Khristan akümbaleni anitsüba liasü (1 Kor. 14:12,24). Ibai Yisui nütsüngtem den koda sendaktep aji lir. Kati ka asoshi taküm yutsüba dang tuluba temeim mali ta Yisui Pa nütsüngtem dang sayu (Yn. 15:13). Khristan ka ama asenok rongnung kati ka tamang nung itdaktsüba mapa nung bendanga agüja inyaktsüla. Iba libaliro yagi mezüng Khristantem jakla sayur (T.M. 2:40-47). Ibai Tsüngremer nübur rongnung temeimji lir (Gal. 6:9-10).
Na meketa alir parnok tamang nung aintsü asoshi Tsüngremi jungkai adoka sayudang medemer Khristantem asoshi nüngdakba tenla agüja yaritsü renemang (Kol. 1:29).