Temeshiba lartem

Kodang asenok temenen nisung liasü, idangji asenoki inyaknüba inyak masü saka temeneni inyakdaktsünüba asenoki inyak ta asenok temulung meyipa sülen tali jangjaa metetter. Aji oda, asenok temenen nung ali tashi asenok temenen lar liasü. Tetezü asenok madak temenen kibur südaktsü nungji asenoki mulungba ama inyaktsübaji asenok atema mapa kanga tasak liasü, kechiyong alari kiburi ashi angatsüla. Aji oda, asenoki yi mejemner saka ajemer, moko aser sali mechiner saka achir, nüktapangta mebenshiner saka benshir, tiyazü aser tangar anema mejembiner saka jembir, kechiyong itemji asen madak kibur temeneni mulungba mapatem lir. Anungji, asenok kibur temenen talenba nungi asenok mechiok tashi asenoki mulungba masü saka kiburi mulungba inyaktsüsa akümer. Atangji, asenok meimchir taküm ya alima nung teti alitsüba aru masü, saka yangi khen lir külen teti alitsüba limajibo molumi mesüra kotak lir. Aji oda, asenok alima nung khen alidang kibur ka mesüra ka kübokbosa alitsübaji alima yimya dak keta lir, kechiyong teti alitsüba alima ana nungjia kibur kaka lir aser asenok alima nung alidang kibur ana rongnungji koba kübok asenok alarsa lidir, iba kasa kibur meyong lima nungji oagia asenok alarsa alitsü. Tanü asenok alima nung alidang asenok teti alitsüba limaji penzüa asenok madak kibur asütsü raktepba kibur ana, ka temeshi aser ka temenen, ana rongnungji ka shima tenzüktsüla. Ibayongji, Laishibai ashir, “Nenoki tashi angaa shiba nem peisasa alartem ama bendanga agütsür, oda tasüba dangi anisang temenen süshia mesüra temeshiba dangi anisang dang tashi angatsü süshia, nenoki shiba dang tashi angar pa purtem nenok lir.” Rom 6:16. Tetezü asenok alima nung alidang alarbo alar amasa asütsü, saka asenok jangratema alitsüba malitsüba aser teti tepeladak alitsüba malitsübaji kibur dakji dang keta lir, kechiyong asenokbo alar asünungji kiburi kechi shidir ibaji dang inyaktsü. Anungji, Laishibai ashir, asenok taküm madak temenen kibur mesüdaktsütsü aser asenok temenen lar masütsü asoshi Yisu Khristai pei taküm bendang agütsü, anungji tangbo asenok temenen lar masü saka temeshiba lar lir. Aji oda, Laishibaisa yamai ashir, “…Tsüngrem nem tenüngsang agüjang, kechiyong nenok temenen lartem liasü, saka nenoki temulung ajak agi nenok nem agütsüba tesayuba nung tashi anga aser temenen nungi nüji kümer külen, nenok temeshi lartem küma lir.” Rom 16-17-18. Anungji, joko asenok temenen lar masü saka temeshiba lar asünungji, temeshibai kechi shidir aji inyaker. Aji oda, joko asenok temenen talenba nungi salarbo asenok madak kibur kata mali ama asenok inyaknütsü inyaktsü aser jembinütsü jembitsü ta masü saka ano asenok madak temeshiba kibur lir, anungji asenokji temeshiba lar asütsü. Aji oda, asenokibo temenen mapa inyaknüa alitsüa akok saka asen kibur temeshibai memelar anungji asenoki meinyaker. Asenok temenen nung alidang kechi koda asenoki temeneni mulungba inyak yamaji asenok taküm nung Yisu Khrista kibur kümdaktsür sülenbo temeshibai mulungba ama inyaktsübaji asenok mapa lir. Atangji, Khristan kümer külenbo temeshi alitsübaji asenoki linüra alitsü aser melinüra malitsü ta masü saka alitsüla. Temenen talenba nungi salar asenok Khrista nung nüji akümbaji asenok inyaknütsü inyaktsüba nüjiso masü saka tanüla temeshi nem asenok anidaktsütsü aser Tsüngremi mulungba inyaktsübaji asenok mapa lir. Aji oda, asenok temenen nung alidang kechi koda asenok temenen lar kümer ali, yamaji asenok temeshi nung alidanga temeshi lar kümer alitsübaji Tsüngremi mulungba lir. Yimten nüjiso akaba lima nunga senso ka pei linütsü malir saka linük temzüng ozüng kübok alir, aji oda kodang asenok temenen talenba nungi Tsüngrem taochi agi kümzük, iba mapang nung jagi asenok taochi kübok temeshi lar kümer Tsüngremi mulungba nung jajar. Iba tajangzükji teti taküm angutsü saka temenen lar asüba taabo tasüba angutsüba liasü. (Rom 6 : 22-23).