Temeshiba metsü prokang

Asenok taküm nung teinyaktsü aika lir aser item teinyaktsütem rongnung temeshiba metsü proktsüba mapa ya kanga tongtibang lir. Apijemtsü Shin tapu 11 tekong  18 nung ashir, temeshiba metsü prokertem asoshibo chichiba sempet yuja lir. Aji süra, temeshiba metsü ya kechi aser kong nungi bener arua kong proktsü (?) ta asenoki tanübo sarasadema bilemdangdi. Laishibaisa ashir, Tsüngrem ya temeshi aser Pai asenoka Pa ama temeshi lidaktsüner. Aji  oda, temeshiba ajak Tsüngrem nungi aser temenen shisatsü ajak mojing nungi angur. Anungji, kodang asenoki Tsüngrem temeshibaji bushidir, idangji asenoki temeshiba metsüjangji angutsü aser itemji asen alidak aseni inyakba mapatem aser asenoki jembiba o tem ajanga proktsü. Aji oda, anogo shia Tsüngremer temeshiba bushiba mapa nung nisunger tajangzük tulu lir ta Laishibai kuli agutsür. Mathi tapu 6 tekong 33 nung ashir, asenoki Tsüngrem yimli aser Pa temeshiba bushira, asenok nüngdak ajak ataloktsü. Atangji, alima nung nisung taküm ka temeshi alitsübaji tasak saka kodang nisung kati pei taküm meshiteta lidir, kecha shisabolutsü mali, asen nüngdak ajak Tsüngremi inyaktsütsü. Aji oda, temeshi metsü prokertem atema sempet yuja alibaji kotak nung dang masü saka alima nunga jenti  yuja lir ta angateter. Yisu temang iba lima nungi piladang, Pai asenok anepalutsü asoshi tanüla temeshi yoktsü nangzük. Aji oda, iba tanüla temeshi jagi anogo shia asenok anüker, asenok anir, asenok anepalur aser asenok nem telemtetba shitak agidaktsür. Asenoki asensasa alir amai bilema alitsüa akok, saka asen madak kibur aser lenir ka lir, ibaji Tsüngremi yokba tanüla temeshi, anungji  iba tanüla temeshii mulungba nung asenok alitsübaji kanga tongtibang lir. Asenoki taküm nung Tsüngrem temeshibaji jungkai adoka alitsü atema asenok bilemba, asenoki inyakba aser asen jakla yimya ajak nung Tsüngremi mulungba meteta inyaktsüla. Asenoki aiben tangar anema majung bilemer, tenük meremer, tenük tasen adoker aser  azüaponger, itemji temeshiba metsü agütsüsang nungi masü. Asenoki inyaksangshi nung aiben tangar metsüdaktsüsa inyaker, asenoki tebang agibo tajung jembir saka mapa agibo mesayuteter. Ibayongji asenoki temeshiba metsü proktsü melena temenen metsü proker akümer. Iba jagi aiben Tsüngrem nungi sempet tajung angutsü melena lendong aser takoksa-ang ajurur. Aji oda, nai Tsüngrem temeshiba metsüji na aolen proka jajadar ta nai bilemer asü ? Mesüra nü mulungjang nungbo tesempatsü mapatem, koba ajanga tanüla temeshii nü taküm nung mapa meinyakteter, item temenen mapatemji dang bilemer ?  Atangji, temeshi mapa inyakba mesüra temeshi metsü prokba nung tajangzük aser sempet tulu lir. Mezüng Peter 1 tekong 15 nung ashir, ” Tsüngrem shibai asenok aja, Pa koma temeshi lir, asenoka yamaji asen jaklaliro ajak nung temeshi alitsüla.” Alima nung yimya ka lir, ibaji aseni kechi prokdir, ibaji asenisa arotsü. Aji oda,  asüng asenoki temeshiba ajanga aruba sempet aser temoatsütemji aginüra, tanü asenoki temeshiba metsü proktsüla. Kechi koda asenoki asen taküm meshiteta alitsü meranger, yamaji asen bilemba, asen inyaksangshi aser asen jaklaliro ajak nung Tsüngremi aginüba ama meshiteta alitsübaji nisung ajak atema tajangzük tulu aketba mapa ka lir.