Temeshiba tsünglu

Hosea mapang Tsüngremi Israel nunger nem temoatsü aser tekümtet agütsünüa liasü saka parnok mulungjang kanga meranga kümdoker liasü. Nisungtemji tera takarba kümli Yihovah Tsüngrem nungi tepilaba kümli ta oda odabo parnok kümzükba Tsüngrem masü saka süngyanglu tsüngremtemang külemtsü tenzük aser Tsüngrem dak jenok masü saka parnoki yangluba mitsa aser bendangertem den jungtepba yimli nung parnok jenok. Aji oda, nisungtem onsara ochimashi akümnungji parnok rongnung nangzüktepba ken o ajak okadak benok jembitsüsa aküm ta Hosea 10:4 nung shia angutsü. Nisungtem rongnung japujari onsara akümnungji, shi jangraba mapa ajak parnoki inyak aser memedemtsüyimi medemba nung dang parnok jangratem angu. Iba amaji parnok dak shiruru jakla dener Yihovah Tsüngrem amadoker aliba mapang, Tsüngremi Hosea ainker ajanga nübortem temulung meyipdaktsünüa jembidaktsü. Iba mapang nisungtem mulung merangbaji alu den atishia Tsüngremi Hosea ajanga Israel nungertem den jembi. Nisungtem mulung merangbaji ali takong ama, tsünglu aruaka aliji mangensara alu nungji mo atemtsüsa masütsü, anungji tsünglu tzü jagi alu ayim junga ali jagi agizüktettsüsa aliji jungjunga angensatsüla, idangjiang temeshiba aser tekümtet kibubaer tsüngluji arutsü ta Hosea 10:12 nung shia aliba angur. Tsüngremibo Israel nungertem nem alima tajung ka moatsü saka parnoki iba limaji süngyanglu agidang sünga kümdaktsü, anungji alu nung kechi prokdir ibaji arotsü ta ashi ama, Israel nungertemi prokba temenen yari parnok rongnung timtem, rongrongshishi aser temulung ayangtsüsa tesama lendong ajurutsüba indang Hosea 10:14-15 nung shia angutsü. Iba amaji Israel nungertemi liaka, Tsüngremibo parnok maotsünü nungji, Hosea ajanga Israel nungertem dang, ” Kibuba aruagi nenok dangi temeshiba tsünglu meyok tashi nenoki taochi angutsüsa nenoksasa temeshiba metsü prokang aser iba atemaji nenok luji angensaang, kechiyong ibai Kibuba bushitsüba mapang lir, ” ta Hosea 10:12 nungjisa shia angutsü. Ajisüaka, Israel nungertemi temulung memeyip, anungji Tsüngremi parnok kümzüknüaka parnok sama. Tanü asenok tamangba aser libaliro jenjang bilemdangra, Hosea mapang Israel nungertem libaliro den kecha balaka masü. Tsüngremibo asenok nem alima tajung ka moatsü saka asenok ochimashi aser shi azü jangraba mapatem agi asenoki asen lima menendakja lir. Asenok tera takarba kümli asenok tali asükümli, asenok tera tulur kümli asenok tali ngasangatema kümli ta, asenokibo kodanga Tsüngrem temeim aser taochi indang mangashidang ama asenok morumoru, sen meimba, pei kija ajungtsü bilemba, nüktapangta aser chidiyongdi süngyanglu külemertem kümogo. Ajisüaka, yangi Hosea tapu nung aser Galatia 6:7 nung shia aliba ama, asenoki kechi prokdir aji dang arotsü asünungji, tanü asenoki kechi inyaker ibaji asenoki asenok asoshi prokba metsü asütsü. Tekümdangtsüji aji lir. Atangji, asenoka Israel nunger amaji temulung temerang, anungji Tsüngremi taochi sayunüyonga asenok dak mamonger. Iba ama tia ka nung asenoki Tsüngrem taochi aser temeshiba tsüngluji agizüktettsüsa asenok mulungjangji anüka alitsüla. Asenok mulungjang anüktsübaji asenoki asen tai nangzüka Tsüngrem taochi meshitsüla. Asenoki Tsüngrem dang kü mulungjang raksajang ta shia tai nangzüktsüla. Idangjiang asen mulungjang nung Tsüngremer temeshibaji amongtsüsa Pai renemtsütsü. Asenok asoshi dang masü saka kodang asenoki tangar taküm aser kibong nunga Tsüngrem temoatsü mamongtsüsa tesamaleni oa ngudir, asenoki parnok dang temulung meyipa Tsüngrem taochi bushitsü indang ashitsüla. Tsüngremibo anogo shia asenok dangi temeshiba aser temoatsü tsünglu yokner, saka iba Tsüngremer tsüngluji agizüktettsüsa asenok mulungjang renemtsübajibo asenok mapa asütsü.