Temesüng nisung kati Naga lima sema senzür pai ajangshiba otsü kar par metemer den lemsateper.

Metemsang : Temba nabo sütoksünema Naga limai ao-a ta angazüka to, koma monga senzür shilang?
Tambusang : Ayaya !! kecha nunga maguba temoatsü tulu ngua jangaratema monger marunüseti-ang arua nu, temba.
Metemsang : Osang tajunga tu aji komasa amongar kedena kar lemsatepang koto.
Tambusang : Ena, paronkbo tuluriang tilar ya tenzüka alira nu.
Metemsang : Ajita na? Ajibo komadang alirar kü danga shiang koto ???
Tambusang : Küm 20 tejaklenbo tulurtemi gari ani mashi liasü, anungji pa koleni odir gari den driversa anir senzür aser len tom nung ajunbena gariji raksara driverbaji kangtemtema gari teraksa nungji mener anitsü aser tulursang jagi gari ki madong tashisa anongtsü tasa liasüa asü, saka tangbo joko dirvertemji garija manishitaktsüji kecha mapa mali tulur kinüngtsü denji kidang sorojoka, Ak, An, Nashi aser Nabong amala anepalua kazür, saka tulur temji temeimtsüka garijia pai dang anir aser pa mesüngdang ita junga senzür. Ano bodyguardtema kanga dang ayong ayonga senzür kechiba süa tulur yagi prangpongji amer par bodyguardsangji anüker aser par bodyguardsangjibo ayong ayonga kecha tetsübu mali tulursangbaji azükloker senzür ati.
Metemsang : wwaaa parnokbo tuluriang yamaji par tenzükertemang yamaji tenzükbaji kanga süngmanger no , ano kar shiang koto?
Tambusang : Ano tajung kaji parnokibo tzü mopung y-aa kanga junga kümzüka ayur. Alemli British nungeri yimsu asüdangbo süngdonglitong ajunga tsüngtoka lemang tululusa yanglu, ajisüaka tangbo parnoki tzü mopung kümzüktsü meji nung British nungeri yangluba ajungaji ayongküma yanglu, ano jaka jaka nung aremmin küma yanglutetogo aser joko takartema aikati parnok alitsü ki tululu sua aliba ajunga to yoktoker tzü mopung tajung alitak yimti tezülenang azüki tilala sur liteptar… Saka tejashitsü kaji, par lima nungbo kor mali anungji parnok ainlen senzüdang aser mapa inyaktsu mapang kor nemsa agütsüba yi to parokiang kor ama bottle ka ana jemli surang mapajia inyakli ta asur.
Metemsang : Temba, ni ajak angatetogo, parnok tulurji pei mapa meinyaknu driver nemji ki mapa ajunga inyakdaktsür, par bodyguard ba indang prangpongji bener garijia pai anir ita junga kidangi meshilangi tetsür tebur tajungbo ajunga den medema senzür adi. Aser na, Centre-i nübur nem agütsüba sen ajunga tulur jagi chimatsür lemangji meyanglu tzü mopung wazüka ayur tasa jembidangar aji. Ano takatem ki tolulu süa aliba yoktok ta asubaji sentsu yong dangari akiatoker ayoka ta jempia azüki tejen nung para akaja lia serba ati aji.. Nai jangratemtsüka achi dang ashi ayatai nubur ati aji saka Kor nem akatsüba yijidang majem nungbo terabosa melenshia akümba lemanga lir sürnunga..
Tambusang : Temba na sa tabensaba a nu nai ashibajiang shitak asütsü südi.

Lilir : Longjen Ozukum, Naga United, Dimapur