Temetetba mesüra tashi angba? 2 Peter 1:5-12

“Pa shisatsü agi kü temeshi tenzükeri jenti temeshi kümdaktsütsü aser Pai parnok tai abentsü.” (Isa. 53:11).
Reverend C.F. Schwartz (1726-1798) Halley University nung professor alidang, pai Tsüngrem O nung tashi angaa 1750 nung Indiai aru, aser par Germany limai ken danga moi küm 48 tashi Tamil Nadu nung tenzük aser pa mapa idakji renem. Pai tashi angabaji temetet dang nungi taoba ta mapa agi sayu.
Tanü asenoki nüngdakbaji jungkai adokbaji dang masü, saka tesüiba nung kechi jungkai adoka lir iba nung tashi angatsü nüngdak. Lai bushiba nung yaritsü asoshi akhidang manguba aser makaba teyari lenmang aika dang tanü angur. Tanü putu nung Lai metetter aika dang adoker. Temetetba tali angutsü atema Mungdang (conference) balala nung dena senzür (Dan. 12:4).  Saka anishiba tashiji tashi angaba masü temetetba azü apungba lir. Temetetba azüapungba aser mezüng tsürabur temenenji liasü. Parnoki Tsüngrem jakdang tashi angaa jajatsüba dang nungi temetetba ji tali azüapung aser jangra. Iba jagi parnoki techi ta ashiba süngjang, Tajung aser Tamajung metetba süngjang achi.
Asenoki temetetba bendentsü Tsüngremi menokdanger. Shidakba nung Paji temetetba aser shisatsü ajak angudak lir. Saka temetetba jagi asenok nem teinyaktsü mapa tulu agütsür. Iba jagi Tenyar Peteri temetetba nung peisasa azüokba bendenloktsü ajungshia zülu. Aji oda mesüra asenoki Khrista metetba tapung aser tejang matangba süngdong asütsü (2 Peter 1:6, 8). Asen ajaki asenoki Lai metetba nungji asüakümer. Asenoki metetba Lai nungji koba tashi asenoki tashi anga lir, iba nung tsükdaker. Tenyar Yakobi tayongzükba tulu agütsür: “Nenok rongnung teshitetter aser tangatetter shiba lir? Pai pa taküm tajung agi shisatsü ajemaluba nung pa mapa sayudakjang.” (Yakob 3:13).
Shin O bushitsübaji jangrar. Idakji tajangzük lir. Saka iba jagi Yisu indang shinba Pa taküm kuli sangdongba nung meyarira kechi nükjitong shin Oji bushir? (J. Adok 19:10c). Shia aruba Kibubai nütsüngtem tenemi arutsü: “Tsüngküm mongpu koba Tebui pei ain nung yua ali, item nenoki metettsü tim masü. Nenok mapaji Pa yimli tuluba kümdaktsütsübaji lir.” (T. Mapa 1:6-8). Yisu taküm kuli indang ainkar shinji “Pa shisatsüi aika alangzüktsü” (Isaia 11:2). Iba jagi tanela shisatsü aser temetetba mezüja shimtet (Lk. 11:52). Asenoki angazükba aser kuli süba putepa lir ma?
Temetetbai tashi angaba dangi manira asüküm agi süngdaktsür.