Temetetba Yinzü Ka – T. Ken 119: 169 – 176

Tekong 169 nung tanelaren temetetba yinzü ka indang sayur. ” O Kibuba, ni ayimtenba na anasa arudakjang:Ne O amato kü nem tangatetba kua.”Sarasademi tangatetbaleni anir. Ibai mezübuba temetetba yinzüji lir.Nai Laishiba azüngdang tangatetba asoshi sarasadem asür asü masü? “Ne ozüng nungi tesüngmangtsü osetemi ngutettsüsa, nai kü nük lapokjangma” ( t.18) ta nai sarasadem asür asü masü?
Tanabuba, tangatetbai nüjiba dangi anir. ” Kü temepishiba ne madangi arudakjang: Ne O amato ni kümzükangma ( t. 170).Ken züluri ochiba Tsüngrem nungi aruba nüjiba asüngdang. Yisui ashi, “Nenoki ochi metettsü, aser ochi jagi nenok nüji kümdaktsütsü” ( Yn. 8: 32).Alima nung talenba tulutibaji tiyazü lir; saka nai Tsüngmer ochiba nung amangra, na nüji lir.
Tasembuba, ibai tanelaren lemtetba yinzü ka lir.Tekong 171 nung angu, ” Kü bang agi tenüngsang adokdakjangma: kechiyong nai ne telatet ozüng kü dang sayu.” Nüjibai tenüng asangba dangi anir. Kodang asenoki Tsüngrem ozüngtemji anagatetter, asenoki ken atentsü akok. Pa O metetba ajanga Pa tenüng asangtsü jangradaktsür.
Tatemsa, tenüng asangba jagi kuli süba dangi anir. ” Kü meli agi ne o indang ken tendakjang; kechiyong ne temelaba ajak temeshi lir” (t. 172).Asenok kuli ajanga mamangi alirtem Yisu Khrista dangi parnok Kümtetdakba ta agizüka arutsü.
Tsüngrem O ji züngang aser sarasademang, aser Tanela Temeshii ne taküm melenshidaktsüba maoaji tenzükang.