Temetongshiba agizüktettetbaji takok sabi

“Shibai temetongshiba meimer pai shisatsü meimer, saka tartsüba semparji tamachi.” A.Shin 12:1

Lanuwa mapang yimdak LPS zünga alidang kü tesayur kati mapang shia kü nem tsüngi o agütsüba tanüa bilemteter.

Talisa kü mulungjang nungi kodanga mamatetba o kaji “tamasa nai sen tebushi, saka temetetba shisatsü (Education) bushiang, süra nai idakji rongsen, konang aser tetushi jenti angutsü”.

Atangji ibaji kanga dang shitak lir. Tanü tashi liyonga arudang tajangshibatem nungi angateter.

Solomon shisa akasangi shisa tarok jenti agütsüba rongnung “Shibai temetongshiba mesüra tsüngi o meimer, pai shisatsü meimer” ta ashiba yaa ka ta züngshir.

Nisung shibai tangar nungi temetongshiba agizüker pai/lai pei taküm nungi rema maoba senti rongsen bendenba mesüka alitsü, kechiaser temetongshiba agütsür kati kodanga tamajung atema masü saka tagizüksang asoshi ibaji tajangzük aketba aser temoatsü lir.

Tsüngremi kodanga asenok nem tamasa temerenshi magütsür, saka asenok taküm nung tajangzük asoshi temetongshiba agütsür. Pai meima metongshitsüba agizüker ka süa iba lenmang nung teti anitaktetba taküm kaka alitsü ajungshir.

Sarasadem

Kibuba Tsüngrem, Nai metongshitsüba angateta benshir taküm ka ni kümjangma. Amen