Temeyoktep putu

– M. Meren, Ex. Pastor, Ungma.

Tanü Naga nunger putu tia ya temeyoktep mapang ka ajurua aruba tia ka nung asenok lisema arur. Temeyoktep ajanga lendong tulu-a adoker aser temeyoktep ajanga yimjunga bener arur. Ajisaka tanü temeyoktep maparen yabo onsara majung putu ka lir, kechiaser Kiralongrartemi temeyoktep oset ajanga bomb yanglur aser ibaji ajanga anogo shia nisung jenti samatsür.
Yamaji temeyoktep maparen ajanga nübortem akoksatsüba maparen kaji, Petrol nung Kerosene meyoktepbajia ka lir. Naga nübori kanga moa ACAUT teloki kanga teni zünga menemshiba ajanga ibaji puteter tangashi kümsa küm iba mapaji inyaka nübor kwika akoksatsür alitsü (?) Iba ama kiralongrar mapa taoba putu nungbo kangabo majurui aliba tanü putu nung ataloker, iba kiralongraba mapa ya Naga nübortem taküm lia tepsetba maparen ka lir. Nagaland Sorkari meimchir jajatsü lenmang meyanglutetba tensa ka nung joko takartema gari tajung alinüaka lenmang majungba agi maliteter, ano gari tajung akartema petrol totzü agibo lenmang nungji motettsüla asüba ajanga longkerak lenmang nung jajatettsü asoshi petrol nungji kerosene shioktsür südi, aji kanga apiteta inyakogo ta bilemer. Tia kaa ACAUT teloki bushitetba ajanga tanü ibaji nübori meteter, saka nübor gari kwika raksatsüogo aser aji Naga nungera telungi aluba asütsü, anungji ano maneni ACAUT telokji ajaki nungittsüla.
Tanabuba temeyoktepbaji  NPF o Congress na meyoktepbaji asütsü. Party ana agi ka akümbaji opposition maliba government kümogo. Kibong nung apuania medema alidangbo kechi mapa südir süaka kati ka metongshitsüli ano katia ka metongshitsüli ta aor, saka kodang ka süadokdir joko temetongshitsür mali pai/lai kechi molungtet ibaji inyaka aor, anungji khenkhenbo iba nungji tamakok alur. Yamaji tanü joko govt. metongshitsür mali, tajunga süaka tamajunga süaka inyakyonga aodang tanü govt departmental ajak nung ochi mashiba otsü agi paper sünga adoker aser aji tebushir mali, kechiaser temeyoktep govt aküm nung joko shingaia shinga tai mebushir, saka ajakji Naga limasa akoksar aser telungi alur ta Naga nungeri angatettsüla aser ajak dang tai tamajungtibaji tebushir maliba limajisa takoksaba asütsü.
Tasembuba temeyoktepbaji Arogo o yimden na meyoktepba putu. Arogo yabo Tanülar yimli anungji iba yimli nungbo mejameja Tanüla yimli nung tetemsüri dang inyaktsüla. Saka alima yimden yimli yabo alima yimli, tenük agi anguba yimli aser iba nungjibo ozüng tesashi ajanga tashi mangartem merenshitsü tashi aketba yimli lir, anungji iba yimli nungjia talanger aser tapet nisung shima inyakdaktsür. Anungji alima yimli o Tanülar yimli na süngra ka nung aputsü tamakoktsü. Arogo yimli o alima yimli naji khenyongi balala saka yimli anaprongla jagi nübor kasa madak pei pei yimli tsütsü nungi yimsü asür. Arogo salangji temeshi pulpit aser yimden pulpitji yim salang lir. Kodang yimden tzüzüng ozüng nübortem nem metetdaktsüdir yim salang nungi tatartemi yim ajak atashia ayimoktsür, saka tanü tensa nung sorkar nungi aruba osangtsüsang ajak Temeshi pulpit nungi metetdaktsür, school osangtsüsang ajak temeshi pulpit nungi metetdaktsür, yimden nüngdak tila teri ajak temeshi sabang nungi metetdaktsür, anungji Arogo temeshi sabangji nübortem  osang metetdaktsüba sabang dang ka mesük. Kechiaser tanü temeyoktep putu, petrol o kerosene meyoktepa ama, special sentong ka yanglu nung tongti o jembir govt officer ka, sarasademtsü yimsüsür ka, tajungshi o jembir yimsüsür ka ta enokra aji yimden sabang ka ama akümer, aser aiben yamaji Arogotem nung ataloker, saka tamshitsü tim ka nung amshiba atema kecha tajitettsü mali aser aji tim dang, saka Arogoi yimsüsür aser officer tulurtemji kanga amshi nung dang Arogo awashi anemtsü ta tangatetba tsütsü nungi kodang tali amshidir ajibo Khristar Arogo memesük asütsü. Anungji Arogoi Tanüla yimli aser alima yimli na kanga junga bendanga angateter dang tenzüktsüla.
Pezübuba nung devotional sentep ya temeyoktep sentep kümogo. Devotional sentep yabo khenyongi balaka lir, anungji iba sentep dang bendanga agütsüba sentep ta ajar. Saka special sentep yabo Devotional sentep masü, tsürabur mapang nungbo iba sentep dang TEMOATSÜ SENTEP ta aja. Kechiaser iba Devotional-ji Tanüla asoshi khenyongi temoatsü balaka anguba sentep lir,  anungji iba jagi tsüraburtemibo asüng TEMESHI AMONG sürabang tanü amai süng soa aji asüng atsüktsü apuketa ayutsü aser teburtem tekolak kou südoka renema ayutsü, ki anasa akaba atsüki kishiji yong agi arakbanga ayutsü, kechiaser asüng meshiteta amongtsü asoshi renem. Ano Deobar nü lenmang nung mejajatsü aser meshishitsü aser malitsü ta yamaji meshiteta among. Saka tanü temeshi among kecha tetezü mali kümogo. Aser Special sentep ajak BENDANGA AGÜTSÜBA sentep den meyoktepogo. Tatishitsü agi: ETC Sunday, CTC Sunday, ABAM Mission Sunday, Children Sunday, Fathers’ Sunday, Mothers’ Sunday, NBCC Sunday, CBCNEI Sunday, Local Mission Sunday, Local Youth Sunday, ano Local Arogo sentep tapu balala agi sünga lir, ano khenkhenbo Sector balala lemsar Devotional sentep agia arur, item ajak jagi bendanga agütsüba sentep maka joko bendanga agütsüba sentep den special sentep meyoktepa putu tensa kümogo, saka bendanga agütsüba sentep yabo khenyongi balaka lir, iba bendanga agütsüba sentep nung amangba pur ajaki Tsüngrem den longjemer pei pei tamang agi asen Tsüngrem nem bendanga agüja Pa den longjemba sentep lir. Shitakba agibo amangba pur shiaji Temeshi Laishiba bener orr Pastor pulpit-i matu tashi ajem-ajema Lai lapoker aji zünga Tsüngrem  O ji bushia Pa den longjema amenba mapang asütsüla. Saka bendanga agütsüba sentepji special sentep aküm nungji iba otsüji dang shia angar oda senshibaji Tsüngrem den tamang ajanga longjema amenba, bendanga agütsüba maka, oda yimya sentep dang lir, oda lokti watidak (social gathering) ka dang mesük. Iba jagi tanü Baptist tamangba ya paper ama apua kümogo. Saka bendanga agütsüba sentep nung Pastor missionary temi Tsüngrem O taret shitak jangjajangja zünger ibaji shitak rateta tatsüka shir Tsüngremji koda tulu aji amangbapurtem nem metetdaktsür sentepba aliba purtem ajak atema Tsüngrem dang temoatsü meshitsür amangbapurtemji pelaseta senshidaktsütsü aji tongtibang ta nibo kü tamang agi shiteter. Saka o jembir karibo bendanga agütsüba sentep nungji amangba purtemji Tsüngrem O agi anar nüktzü ajak yima merenshitsü ta yamajisa ataloker. Saka special sentepji makatsü masü akatsübasa, anungji Devotion oda bendanga agütsüba mapangji tatsüka agir ang, oda tarurtem ajak atema temoatsü meshija Sannükeri mesüra putir kati sarasademtsür külen dang special sentepji akatsüla. Mesüra tanga mapang ka agiteta akatsüla. Aji mesüra Baptist tamangba nung Devotion sentep ya lokti longsolongben sentep dang ka akümtsü yakta mapang ka arutsü ta nibo penzüteter.
Ano tanü temeyoktepba maparen kaji yi den THINNER koba ki rong atepdang rong den meyokteper iba denji yi meyoktepa putu. Kechiba tanü putu nung asangur küm 30 aser 49 matongdang sümar ta aiben bilemdanger, kechiaser akhidang tsüraburtem yi agi dang taküm lia aru, saka parnok nisung kata jemseta masü, saka tanü putu yi ajemer nisung kata mejenbuteter aser ibaji yi den Thinner meyoktepba ajanga asür ta tanüang bushiteter, saka ano aji memeyoktep maremtsüsaji Naga nunger asangurtembo ajak koubang tanak ser leperi okümsa ta kanga sasatsür.
Tatemsa tanü temeyoktep putu tensa nung Naga nüchiso bushir telok ajak ka küma meyoktepba mapang. Tetenzükdangbo ka dang liasü aser küm ishika tsüngda nung tangatetba balala kümer telok aika küma prokshiogo. Saka tanü tangatetba tajung nung mezüng ama ka küma meyoktepner süra aji koda temoatsüba. Naga nunger ajaki molungbaji aji asütsü. Saka arem nung aliba shiruru koba dang JEBJU ta ajar pa dak aketba tezüng ajak tu tangar yirutsütsüla kanga dang teshira, taju agi sünga janga lir, anungji parnok koba tesepdi nung sendena ayiptsü mapang tongdir külemi nungtepa memejanger, kechiaser parnok tezüng taju agi sünga janga lir, anungji tesepdi nung nungdenaka balala ayiper ta tsürabur nungi jembia arur. Iba amaji taoba mapang tashi nung pei pei tangatetba nükjidong balala liaka ajakji ka küma ajaki molungtsüsa yanglur kiti nungji nungdenra aji Naga nunger asoshi anü tasen adoker akümtsü, saka Jepjui pei tezüngji petoka meindoki pur alidaki ora puri jena okümsa, anungji Naga nunger telok ajak longjema meyokteper süra nübor ajaki molungba nung nükjidong ka nungji longjemtsüla, saka telok kati danga pei tezüng tajuji mepetoki pur den meyokteptsü ora puri pur tezüng taju jagi atubaji maremtsüsaji jena okümsa ta tanü temeyoktep putu ka ajuruba agi tajung nung meyokteptsü tangatetba kar lemsateper.