Temjen Toy-i AGOK Badze Multi-Utility Centre atema lung azüngtsü

November 09, 2017 nü Meriema nung Wb. Temjen Toy-i AGOK Badze Multi-Utility Centre atema lung azüngtsüba sülen tangokba noksa nung angur.

Kohima, November 09 (TYO): November 09, 2017 nü AGOK Badze, Meriema nung Angami Gazetted Officers’ Krotho (AGOK)-i ayongzüka AGOK Badze Multi-Utility Centre atema lung azüngba sentong ka agi, aser Additional Chief Secretary & Finance Commissioner, Temjen Toy, IAS-i lungji azüngja liasü.
Iba sentong nung AGOK züngsemtem den jembidang Temjen Toy-i, tribe ajak Officers’ Union lir, ajisüaka ajakibo nübur atema bilemja meinyaker, saka AGOK-ibo union ka ama tenzükba mapang nungi nüburtem atema mapa tajung inyaka arudar, ta ashi.
“Kohima ya state yimtiba asünung, Multi Utility Centre tajung ka nüngdaker, aika lir saka kati danga standard agi matong,” ta paisa ashi.
Paisa Krotho dang, ajaki tatishitsü süa reprangtsüsa iba project ya quality tajungtiba agi yangludaktsüner, ta ayongzük.
Paisa, kenü anogobo sorkar aser melungtet telok balala AGOK indang Multi Utility Building nungji seminar aser workshops agitsü imlar, ta ashi.
Tarutsü atema lanurtem renemshitsütsü nüngdak, ta shia Temjen Toy-i, “Tarutsü indang lenmang nung asenok kanga kera jajadar. Tarutsü den peta asenok renemshitsüla, aser asen lanurtem tarutsü atema renemtsütsü asoshi tongtibangtibaji parnok melungsentsü/teshisadangba melenshitsütsüla,” ta ashi.
Iba sentong lenir AGOK Tir, Dr. Kedozeto Punyü-ia Temjen Toy, IAS-i iba sentong nung tetushi tejaoker ama adentsü agizükba atema pelaba lemsatep.
AGOK Tirisa tesüiba mapangtem aser tang aliba züngsemtem, talisa Kevisiezolie Suohu, Thepfulhouvi Angami, R. Kevichüsa, Molhou Zhasa aser asür Dr. Zakievotso nungeri Krotho atema mapa tajung balala inyakba asoshi pelaba lemsatep.
Paisa, AGOK ya 1983 küm tenteta mezüngbuba Tirji K.K. Angami aser mezüngbuba tongti tezülurji Thepfulhouvi Angami na liasü, ta metetdaktsü.
AGOK Badze ya 1991 küm November 19 nü sen 2,40,000/- agi ali aser iba tasazükji acre 3.07 lir, ta paisa metetdaktsü.
Iba centre nung nisung 700-800 menshitsüsa conference hall den gallery, nisung 50-60 menshi mini hall ana, ainertem atema deluxe room ana aser tajemba agia gari 100 shi anena yutettsüsa parking facility alitsü. Iba project ya küm 2 nungbosa tembangtsü nükjidong lir.
Sentong nung AGOK tatong Tir, K. Neibou Sekhose-i tepela anküp o jembi aser Meriema Baptist Church Pastor, Keduolhoulie Shüya-i meshiteta sarasademja liasü.
Iba sentong nungsa AHoDs, HoDs, taoba mapang AGOK Tir aser Secretary tem, AYO, ASU, AWO nungi lenirtem, AGOK züngsemtem aser temeimertem aika dena liasü.