Temjen Toy-i kaket (Case Study) ka sayaogo

Zunheboto, Aenjeti/January 14, 2020 (TYO): Mongolbarnü Zunheboto nung Soil & Water Conservation, Land Resources aser Agriculture Department telongjem sentong ka agiba mapang NAFCC (National Adaptation Fund for Climate Change) project kübok Nagaland nung tekong lu ayimba (shifting cultivation) dak sendakba nung ajemdaker züluba case study ka Development Commissioner, APC aser GM NABARD matsüngdang Chief Secretary, Government of Nagaland, Temjen Toy-i sayaa liasü, ta DIPR sangdong ka ajanga metetdaktsü.
Sentong nung Chief Secretary, Temjen-i jembiba mapang pai, alu ayimertem dang alu ayimba indang nung tajangzüktem metetdakja iba project tajungba inyak aotsü atema Agri aser külem sendaktepa alir department dang longjmer inyakysü asoshi ajunshia liasü.
National Adaptation Fund on Climate Change (NAFCC) kübok achaayangaba research aser terenlok maparen sentong ajak ya tzü mopung melenshiba (climate change) dak sendakba nung tekong lu ayimba den külemi asadanger, ta kasa sangdong ajanga metetdaktsü.