Temjen Toy-i “Naturally Nagaland” lapoktsüogo

February 27, 2020 nü New Delhi nung Chief Secretary Temjen Toy aser tanga ketdangsertemi Naturally Nagaland lapoktsüba mapang tangokba noksa ka yangi angur.

Dimapur, Tsüklai/February 27, 2020 (TYO): Linük yimtiba (New Delhi) nung Nagaland nungi yanglutetba aser product tem ayoktsü lenmang lapoktsütsü nükla nung, February 27, 2020 nü Chief Secretary, Temjen Toy-i BKS Marg, New Delhi kübok Nagaland Sales Emporium nung “Naturally Nagaland” lapokja liasü, ta sangdong ka ajanga metetdakja liasü.
Osangbenertem den jembiba mapang, Temjen Toy-i ashiba agi, Naga nunger shawls, daos aser tanga osettsüsettem kisung sayuba dang nungibo, state nung temelenshi adokba ajanga lanur tsüngda chiyongtsütem yanglutsü densema tanga oset balala yanglur, ibayongji parnoki yanglutetbatem ayoktsü asoshi department balala longjemer arok meyong atema outlet ka agütsür.
Nagaland nungi adokbatem ayokba tesem nung anguba oset kar tenüng teta shia, Temjen-i, kholar, ninang mojitzü, bamboo charcoal, süngjanglijang taking den süoshitem aser tawa sayaba Naga fashion brand – Mongken tem teyokdak lir.
Iba emporium ajanga nüburtemi Nagaland nungi adokba chiyongtsütem aser yangluba osettsüsettem anguba dang masü, saka item oset aser chiyongtsü ya alitsü, ta Temjen-i imlaa ashi.
Iba maparen ya Women Resource Development kübok Nagaland Bamboo Development Agency, (NBDA), Nagaland Bee Keeping and Honey Mission (NBHM), Nagaland Bio-resource Mission (NBM), Myki longjemer aser Government of Nagaland kübok Development of Under Developed Areas den Nagaland Handloom and Handicrafts Development Corporation, PSU külem ser tenzükja liasü, ta Principal Secretary of Industries and Commerce Department, Nagaland, Lithrongla G Chishi-i okila nung metetdaktsü.
Nagaland nungi adokba chiyongtsütem, alu nungi züsentetba chiyongtsütem, sobaliba sübosülemtsü balala, teka agi yangluba osettem aser teka agi atakba süoshitem ayoktsü asoshi Naturally Nagaland ya tesem ka asütsü, ta Lithrongla-i ashi.
Naturally Nagaland lapokba sentong nung NHHDC Chairman Miathou Krose, Mission Director, NBDA Imtirenla Jamir, Joint Director DUDA Anungla Phom, DRC Delhi Kethosituo Sekhose, Managing Director NHHDC Zakabo V Rotokha, Team Leader NBHM Khüvozoyi Vese nunger den külemi tanga department tem aser ketdangpurtem dena liasü.
Nagaland Sales Emporium, New Delhi ya Kharu Design Nagaland-i yanglushija liasü.