Temoatsü angu, kanga tsübu, atenten, mejanga melitet

–  Imdang Ozüküm. E.Er.BSNL.

Küm 30 ji ka süiogo, kanga meranga inyakba asangur chanu ka, pa tasoli toktsür Dimapur nung school azüngtsü tsürabur nungi pilar arua bara ki tila ka mesemteta liasü. Oda oda pai Autorickshaw anishia sen lenmang bushitsü pai mulungtet, kinungertemi pa dak kanga meim aser temulung toka liasü. Pai meranga ayanger Auto tejen ka alia anishitsü tenzük. Iba mapang anogo nung Auto ka jagi teimtiba agi sen Rs 150/- kanga meranga aabaji liasü. Ajisüaka pa aji agi kanga temulung süa liasü aser khen hire asüba nung Rs15/- ang liasü. Anogo shi pai anepdang nungi nikongtsütsü mangsema Auto nungji senzüli kidangi arua tzü chikoshir sorochioka chiyunger tanü sen kwika aazük ta züngdanga kanga temulung pela-a chiyongshir mejangli ta asü. Kecha shisabulu mali. Iba mapang nung Dimapur nung sen Rs 10,000/- agi ali dalang town area nung alitsü koka aliba mapang liasü.
Kenü anogo tzümar ka pai ajuru, tzümarba jagi pa dang jaka ka nung ki kadi meinokjang ta Auto ji hire asütsü mepishi. Aser pai iba tzümarba ji meinoktsütsü Autoji atemlok. Iba tzümarba ya dhoti agir aser chapel ka semer tola temesüng talangka semer liasü. Ibai nikongtsütsü teraa mangsemer liasü. Tzümarba anentsüba jakaji tonger tzümarba jagi baraji agütsü, pa kidangi meyipa shilang. Kodang pa ki atong pai Auto tesülenji juli ka angu. Aser juliji lapoka reprangdang nung idakji sen Rs 1,00,000/- (Rupees one lakh) inoka liasü.
Pai bilem ni joko takar kümogo, aser ibai tzümarba indangtoa, ni mapang tatsükabo Auto ya mamshi-i kidang dang ayutsü ta sür merang süngden ka nungji telonglenji senji lemer süoshi agi nempanger chi chiyongshir yipteni ai. Kodang yipten nung ondak pai tsübua ait, aser tzümarba to bilemtet, aser ano iba sen yagi kechi inyaktsü (?) ta külen bilemer, ano ibai tatidang ka aruogo ta bilem. Pa aonung sangwatsü yongyaseta amuoa moi iba aonungji tzümarba aser iba sen jagi pa timtemdaktsü. Lipok 12:11-20 tiyazü jembiba ajanga Egypt Chuba Abrahami shisabulua aonung sangwa amuoa modaktsü amai. Temenen sen kidang aliba jagi kanga shisabulu tena pa kangshi. Yisu denbo shisabulu maka, tetsübu mali, ta angateter.
Kodang sangwaa aküm pa memejangi sangwa yongyabaji kechi atema? Pai ibai temenen tatidang ta pasasa pa tebang nungi memeteti ola adokadok, aser pai senji merang süngden tilaka nungjagi agitet aser pai Auto Box nungji inok aser yasüng chisüngji nümdanger pa timtemdaktsüsang tzümar sang anendakto bushia apuso.
Kodang pa kimaji atong tzümar sangji kishi nungji metongloker ali nungji ranglokbaji marakzüi nokdaka liasü. Aser pai aja nung junga meranglok aser pai khenbo bilem, pai ni ya memetet aser majiteter, anungji odang oatokdi, ta sür Auto jagi tua amen, saka pa mulungi senji tagi ta pa den jembijen jembi. Anungji pa Auto nungjagi ano alur tzümarba dang ya nü sen yasüng kü indang Auto nung toktsüba to nü dangi bener arutsür, ta sür agütsü nung tzümarbaji aoksa, aser pa den salem aser kecha senji mezüngdangi Hotel kati anir ao.
Saka pai mechiyongtsü ta ashi saka tzümarba jagi kechi südir süaka külemi chiyongtsü ta ashi saka pabo bara senzütsü temenur ta sasaseta mapang aobaji bilemer, saka tzümarba jagi chiyongtsü tajungtiba meshi aser jangratema tena pelatepa chiyongtep, pai bilem, tanübo langogo, tetezü chiyongba jagi kangasa periogo ta bilem. Ano tzümarba jagi pa atema shisabulutsü ka agütsü pa nem sen Rs 20,000/- atsüteter tepela agi agütsü. Anungji pai magitsü ta tekong meranga nokdak, khen ashitsübo asangur chanu ya suwar amai ta ashitsü koka lir, ano Rs 10,000/- agütsü, ajia magitsü ta ashi. Anungji tzümarba jagi yabosa agitsüla ta sür Rs 5000/- agütsü (joporjos) agi. Aser pa dang ashi, na timtem nung onoki yaritsü anungji iba address nung phone nung ring süang ta sür phone number agütsü aser tzümar jagi ashi, Naga nunger kanga junger (Naga admi pohod aja hay) ta shia tena pila saka ajiser mobile phone maliji mejembitet. Iba mapang pa nem agütsüba sen Rs 5000/- ji tang Rs 50,000/jenjang asütsü. Kanga temulung asü. Aser kidangi meyipa aru.
Ni ka asübo, Half Nagarjan nung ali bika ka, Super market nung bika ka, Purana bazaar nung ali bika ka, Kohima nung summer atema ali tilaka aserbo distance nung tzülu den ango tzübu aliba ka enjoyments atema ta alia dang yabo jangratema lila.
Iba asangur chanu dak Isaia 33:15-16:- shibai ochi shia jajar aser indangindanga jembir, shibai pei külakokjaa anguba tajangzük sempar, shibai sübokrem magizüktsü teka rüktoker, shibai azü tokshiba mangashitsü tenarong tangpanger, aser tamajung dak mereprangtsü tenük amuoadoker pa temalen alitsü, ta iba asangur chanu nem Tsüngremi apuoktsü sudi.Yob:1-8 Tsüngremi satan tebilemba meteta lir. Pai ashi, kü tenzüker Yob dak tenük yokogoma ? Pa ama alima nung tamajung sempaba shinga mali. Satani Yob rongsen aser shi nung tesama teimtem agi atitang.Saka Yob dak tanüla temeshi liasü.Yobi ashi, Yob 19:26 nung,” Aser kü mang shizüka orr külen, shi nung mesüia ni Tsüngrem nguküm.
Asangubai bilem südi, A.Shin 1:10:- Kü chir, temenen puri na mesüzükra nai hai haura teka.Iba asanguba ya mojingi tendangbaji rongsen agi atitang ta ni bilemer.Pai iba senji meyipa bener oa magütsü asübo, tzümarba kishi züng nung shisabulua mangmanga anepdang yakta nokdaka alibasangji, aonung sangwaa shisabolua memejang alitsü, iba sen yagi tenaprong memejangdaktsü, kechiyong sen meimbaji temenen tera. Kodang pai senji meyipa agütsü, pa mulung tepela agi asüng, aser tzümarsang peladaktsübaji pa atema onsaraa senti mapa ka pai inyak, kechiyong tzümarbo ibala nungji soseta asütsü ana nung dang lir. Ni bilemer pai sen agutsüdangji tzümarba peladaktsübaji dang masu, saka pai nisungba takümjia kümzükogo.
Kibong nung mezüng tanur tebur chanu ka asodang pelaba denbo kanga agi tuluba tzümarbaji pelaa alitsü. Aser iba mapang nungji asen KibubaTsüngrem Koda teplaba alitsü kechiyong iba asangur chanui Tsüngrem mulung chidaktsü aser mojing kodaka jashia alitsü. Ibaji asen teyanglur atema kanga temulung asüba aser temulung achiba tongtipangtiba mapa ka liasü. Tzümarba jagi Naga nunger ya kanga ochishir kin ka ta kanga tenüngsang agütsü. Asangur ka kisungi Naga nunger kanga Ochishira ta tenüngsang aazükbaji koda jangratemtsü. Tanü Naga nunger 100 nung ochishir 10 danga ali nungbo , Abraham-i Sodom Gomara mesamadaktsünüi kümzüknüba ama, Naga lima yaa mesamai Tsüngremer sentong atalokdaktsütsü. Ni bilemer iba senji pai odang senji agi nungbo pa tang ya koba jenjang nung lila ? Pa ya takar kümer shinga mengui lila asü ? Mesura jemseta sür leper telong nung mejanga lila, kechiyong Laishibai ashir, takar nisungi kodak yimlii aitsü dang nungibo ajem kii Ut(Camel) süitsü temelaba. Mathi 19:23-24.
Saka pai takok tashi temenenji kanga meranga nokdang. Anungji pa nem kinungtsü tajung ka moatsü, jabaso tajung ana (2) tazünger dang kümogo, tashidak melii kibong kanga pelaseta jangratema alir. Kechi aka aji agi pelaa alibaji ajak dang tajungtiba. A. Shin 22:1-3 nung, Rongsen tulu dang nungi tenüng tajung shimtettsüla, aser hon aser taribi dang nungi maongka tajungba, takar o sensaker na külemi ajuruteper, parnok ajak teyanglurji Kibuba. Aser teti iba nisung angu dang kanga temulung nung kongshir aser temulung achir, Kibubai moajangma.
TRAIN STATION NUNG ASANGUR KA :-
Küm 35 shi süiogo asangur ka train station Dimapur nung kazüa nokdaka alidang tzümar tila tanur kati juli ka nung sen merijang Rs 40,000/-bener arua iba asanguba dang iba sen ya na samaa asü ta asüngdang , iba asangubai kü indang masü ta shir, iba tila tanurji Railway intep to ajanger oadok. Iba asanguba jagi yakta dang bilemtet, ni yabpushir ato, kanga dang pelara ta sür, meshizüka bener iba minute nungjisa kidangi tuadok asübo kanga jungla, ta kangasa kanga sasaseta tanubusangji bushidang, saka otemer pai dang tashi sasar ta ashir. Pa station metoktsüdangjisa Nepali nunger ka pa sen merijang lir(Rs 40,000/-) samaogo, kari danga ngua lira imlipilema agüjang, ni senji terabo agütsütsü ta jepa arua nisung ajak dangji mepishia senzü, Saka iba mapangji Nepali nungba atemaji tesasatsüka Keyi (Tiger) chanu nem shi agütsü nung, mesura Tzüraba azü (dog) tekong nung shi alenloktsü nung meyipa angutsü masüji, aser shirong chanu asenoki meneptsü masüji,sen matoksangji jepa nokdaka yutsür paia kanga meimseta repranger kidangi atu ta ashi.
Ashi, pai senji tanur ket nung jagi meshizüker pa teka nung amer ken danga ata nung, tebushirji arudang pai senji agütsü nungbo pai mapa tajung ka inyakter ka asüba liasü, aser Nepali nungbaji ajangzükerba liasü.Pa Tsüngrem nungi koda temoatsü süla. Saka pai iba senji kü meyong masü ta ashibaji Tsüngremi pa kümzük ta bilemer. Iba ama Tsüngremer sentong ka aliba yong pa taküm Tsüngremi wazüka yutsü sudi ta Tsüngrem tenüng asanger. Kechiyong iba senji agi nung pa taküm melila, kechiba süra pai temesepba jemya liasü. Tangbo pa mapai yir, tetsür tajung ka agir aser jala jabaso tetemjen soa alima rongsen nung takar küma jangratema alir. Karbo Tsüngremi asaa dang meimer ta asübaji iba nisung yaa ka ta teti repranger .
Tsüngremi pa nem agütsüba sempet tulukaji pai tashidak aika puteta pa teka agi yariba ajanga tashidak aneper. Assam nungertemibo pa dang Doctor ta ka ajar aser temang teret aser tezü aser poknüng tashidak puteter. Pai yaribaji taneptsü aika angur. Iba temoatsü iba olem sapang nung lemsateper . Teyanglur Tsüngremi Iba osep tangatetba nung azünger ajak moajangma. AMEN.