Temoatsü aruba

Asenok ajaki Tsüngrem nungi temoatsü aginür, ibayongji asenoki anepdang nungi aonung tashi sarasadem shia temoatsü meshir. Atangji, aginüba agi meshir aser meshira agütsütsü ta Tsüngremia nangzüka lir. Ajisüaka, asenok amangba purtemi metettsüba kaji asenok taküm dangi aruba temoatsütem ya meshiba kija agi arur masü saka Tsüngrem dang tashi angaba ajanga arur. Tetezü, meshiyonga tashi mangara magütsütsü. Aji oda, kodang asenoki Tsüngrem den tashi angaa jajadir, Pa dang asenoki moajang ta asüngdangtsü menüngdaki akümer, kechiyong Pai asenok nüngdak meteta lir, anungji asenoki masüngdangdangyongi Pai asenok moatsür. Tazüngkunem 28 : 2 nung ashir, ” Kibuba nü Tsüngrem ola nenoki angadi süra, item temoatsütem ajak nenok madaki arutsü aser nenok sülen anidaktsü.” Iba laishiba tekong ya rasaa mashiyonga asenoki angatetter. Yangi jangratemtsü talila kaji asenoki Tsüngremi ashi angaba nung asen taküm, kibong aser lokti dangi temoatsü aruba dang masü saka temoatsü asenok sülen anidaktsü. Aiben asenoki iba ama Tsüngremer tenangzükba amadokba ajanga Tsüngrem nungi temoatsü angulen lenmang memeteti timatemer. Aji oda, Tsüngremibo asenok teti moatsünüa dang alir. Ibaji asenoki tashi angaba tanurtem meimba amai lir. Tanurtemi tashi angara tsüraburtemi parnoki memeshidangyongi parnok nüngdak reprangteta agütsür. Iba kasaji anogo shia asenok taküm nung Tsüngremer temoatsüji meimlaba mapang nung meimlaba nisung nungi arutsü. Tsüngrem dang tashi angaba amangba purtem taküm aser kibong nung iba ama temoatsü anguba aiben ajangshir alitsü. Asenok jashia alidang meimlai ka medemerr kar asenok mulung süngzüktsütsü arutsüa akok, tamakok nung alidang meimlaba nungi teimla angutsüa akok, senotsü nüngdaka alidang meimlaba lenmang kar nungi teyari angutsüa akok. Iba amaji asenoki Tsüngrem dang tashi angaba ajanga asen dangi temoatsü angubaji asenokibo mangatettsü aser mezüngdangmatsü. Ajisüaka, asenoki aiben asenok nüngdak dang tali asenoki aginüba ajunga angubajiang temoatsü amai bilemer. Iba jagi aiben asenoki tashiyim agi mesüra ochimashi lenmang tapu balala nungi ‘adjust’ süa temoatsü bushir. Ajisüaka, asenoki anguba rongsen ajakbo temoatsü masü. Temoatsü o rongsen na ya balala. Temoatsü ajak rongsen saka rongsen ajakbo temoatsü masütsüa akok. Aji oda, asenoki temoatsü arulen lenmang junga mangateti rongsen agi temoatsü kümdaktsür bushira, ashiko asenoki anguba rongsenji temoatsü masü lendongang asütsüa akok. Ibaji bilemdangtsü atema tanü yangi asenok den iba Tsüngrem o ya lemsateper. Aji oda, kodang asenoki temoatsü ya Tsüngrem dang meshiba agi masü saka tashi angaba agi arur ta angteta lidir, temoatsüji asen kija dangi masü saka asen chirnur, asen adianu aser telok dangi arur aser itemji senmang küma moatsür. Asenoki aiben Solomon chuba akaba indang jembir, ajisüaka pa akabaji tebu David-i tashi angaba ajanga pa nem maotsüba temoatsütem liasü. Aji oda, Tsüngremi Abraham dang pai tashi angaba ajanga alima nung kin tulu küma moatsütsü nangzükba indang Lipok 12 nung shia angur. Tanü yangi asenok den lemsatepba ama asenoki Tsüngrem temoatsü arulen angatetra, asenoki Tsüngrem dang temoatsü meshia sarasademtsüba dang nungibo Pa tashi angatsübajiang tongtibangba ta angatettsü. Aji oda, Tsüngrem dang temoatsü meshiba dang nungibo Pai agütsüba temoatsütem züngdanga pa tenüng sanga Pai ashi angaa ali tajungba ta asenoki tali tajungba angatettsü. Atangji, tanü putu ya rongsen bushiba putu lir. Ajisüaka, Tsüngrem ashi mangai rongsen bushiba nung lendong timtem aser takoksa lir ta angatetdi. Tsüngremi ashi manga inyakba nungi anguba rongsenji kodanga asenok chirnurtem asoshi senmang küma renloka maotsü ta asenoki angatetdi.  ” Tsüngrem dak dang amanga tajung inyakang, aji süra ali nung tasoshia alitsü,” ta Tenüngsang Ken 37:3 nung ashir. Tetezü Tsüngremi mulungba ama tashi angaa tajung inyakbaji dang asenok alima nung tasoshia jangratema alitsü asoshi temmoatsü arulen lenmang lir.