Temoatsütemi anidaker

Aser Kibuba ne Tsüngrem ola nenoki angadi süra, item temoatsü ajak nenok madaki arutsü aser nenok sülen anidaktsü. Tazüng. 28:2.

Kodang nai Tsüngrem den telungjem nung jajadir, nai temoatsü asüngdangtsü menüngdak. Pai na moatsüner! Nai meimlaba kar meimlaba sempet agi na peladaktsüba ama, Tsüngremi Pa sempet nai meyimla mapang aser lemang nungi agütsütsü. Tsüngrem temoatsü na mazüngi aliba mapang nung arur – mazüngi alidang telephone nung jangratemtsü tepelatsü osang arutsü akok mesüra osangtajung shiti agizüktsü akok. Aiben Tsüngrem temoatsüji yimjak nung ajaki ngua marur saka meyimlaba lemang, atamata mapa nungi arur. Nai Tsüngrem temeim kanga nüngdakba mapang nung temoatsütem arur.
Tashi angaba nungi temoatsüji arur. Kodang nai Kibuba den jajadir nai masüngdangdangyongai Pai moatsür. Nai tashi angaba temoatsütem ne chirtem aser semchisemnurtem tonga arur. Solomon yimsüsüba mapang rongsen tulu madak pelaa liasü, saka pa temoatsü tuluba tesüiba putu, tebu Dawidi Tsüngrem dang tashi angaba nungi anguba liasü. Tsüngremi Abraham dang pa tashi angaba nungi alima nung kibong ajak moatsütsü ta nangzük (Lipok 12:2-3).
Tsüngrem sempettemji odang agütsüba ama tagizük. Kodang nai meyimlaba temoatsü ka agizükdir, Pai maneni meimba atema tenüngsang agüjang aser ne sülen anidakba temoatsü metettsü renema liang!