Temsüa Jajaang

…, koba ajaba agi nenok ajak, iba ajaba temsüa jajatsü, Ni, Kibuba nung tepuokbai nenok dang mepishir. Efesa 4:1-3
Pauli Efesa 1-3 nung Khristan tesayuba aser Khrista nung tamanger ka jenjang indang jembi. Tang iba tapu nung tamanger mapa aser yimya lemsateptsü indang jembir. Pai pasasa Khrista nung tepuoker ka ta jembi aser tesem kar Tsüngrem aser Khrista asoshi talenba kilir taaka amshir. Pai tamang katetta aser tashi angaa Yisu sülen anidaktsüba tasak ta metetdaktsünü saka parnok tajaba temsüa jajatsü Pai ayongzük. Tamanger tekümtet dangi ajaba nung Tsüngremi taochi talubusa sayu (Yn. 15:16), parnok tetemsü ta masü, saka tamangertemi temsüa jajaba agi Pai aochiba sayutsüla.
Pauli asenoki anogo shia jajatsüba meraji tanü asenok dang sayur. Yisu jajaba ama jajaba, Yisui bilemba ama bilemba aser Yisui jembiba ama jembiba ajanga asenoki temsüa jajaba sayur. Kibubai asenok dak kongshia tasüngdangba ka asüngdanger aser ibaji asenok ajaki langzütsüla. “Kechiba nenoki Kü dang Kibuba, Kibuba ta ajar, aser Ni ashiba meinyaker?” (Lk. 6:46). Asenoki kechi inyaktsüla Pai shia lir.
Nai Kibuba ne Tsüngrem meimang, aser ne kiyonger meimang. Pai asenok tali tayongzükba agütsür: “Kü dang Kibuba, Kibuba ta ajar shiai kotak yimli-i aitsü masü, saka shibai kotak nung aliba Kü Bui mulungba ama inyakdir pa aitsü” (Matt. 7:21). Asenoki tejembidang mejembi, tejajaa jajatsüla; temsüa jajatsüla.
Tsüngrem, tanü Nai kü o tem aser mapatem anüktsü ni Ne dang mepishir.