Temulung malem bilema taoba CIA officer apu

Washington, Jan 17 (Agencies) : Temelaba magii ‘national defence’ dak sendakba kechisarena aser zülubanglu kar bena aliba nung ajemdaker taoba CIA officer ka pua lir.
Osang ajanga ashiba agi, arishi küm 53 tain Jerry Chun Shing Lee-ji (Zhen Cheng) Hombar aonung New York yimti nung aliba John F Kennedy International Airport tonga arur külen apu, ta Justice Department
ajanga metetdaktsü.
US senso Lee shiba tang Hong Kong telidak liasü, pa ya 1994 nungi 2007 tashi CIA nung inyaka liasü.
Lee shiba ‘national defence’ dak sendakba kaket kar bena aliba atema apu, pa anema kuli tejangja ngutetra talangtiba agi küm terbosa tsüngden chiokdak puoka ayutsü.
Okadak nungi nguetba kuli kar ajanga ashiba agi, Lee aser par kibongji 2012 August ita nung Hong Kong bushia ao saka tanaben northern Virginia nung alitsü asoshi United States tonga aru.
Lee aser par kibongji United States tonga arur külen Hawaii aser Virginia yimtitem kübok hotel balala nung anenzüka liasü.
Hotel nung anenzüka aliba mapang FBI agent-tem court nungi temelaba bener Lee anenzükba taktang tonga oagi bushisüngdang aser iba mapang temelaba magii bena aliba kaket-temji ngutet, ta Department of Justice ajangasa metetdaktsü.