Temulungjang aser Ki (T. Ken 101:1-8)

Takar aser sensaker, tulur aser tilar ajaki pei tashi yari ki asür aser pastor jaoka sarasadema ki tasenji lapoka alir.
Kidang tongtipangtiba shilemji kechi? Mezüngbuba nai ashitsü südi kimong aser soruchiokdak amshiba chipo-aon po. Saka kidang tongtipangtiba shilemji kibongji lir. Aser iba kibong nung tongtipangtiba shilemji iba kibong nung alir temulungjangji lir.
Dawidi par ki meshitetdang ibaji ashi. “Ni kü sasa shisa kaa shitakba len benshitsü. Aya, na kodangang kü dangi arutsü? Ozü kidang ni temulungjang teindang agi jajatsü” (t.2). Nai ne ki pensanüra, ne kibong pensatsü tenzükang. Saka nai ner ki aser kibong ajak Tsüngremi mulungba ama lidaktsünüra, ne mulungjang merüka tabensa liang.
Tabensa mulungjangji kechi? Ibaji telemsa makai ka dang sür tsüngchir süa aliba. Shingaia kibur ana metenzüktet. Shingaia alu alaba nung ametter tesülen reprangtsü makok. Telungjem aser tsüngchiba temulungjang na akatsü tenüngdaktsü. “Ne ochiba nung jajatsü: Ne tenüng tsübutsü asoshi kü mulungjang lungjemjang” (T.Ken 86:11). Pai par ki tasen meketa jajaa ashi, “Ni Kibuba nem ajunga agütsütsü asoshi kü mulungjang tabensa linür. Ni kü kibong nung junga yimsüsünür, kechiaser Pai kü mulungjang nung yimsü asür.”
Naia kasaji shitettsü asü?
Ne mulungjangi ne kibong nung mapa inyaker. Saka Kibuba nem bendanga agütsütsü tenüngdaktsü. Nai Kibuba dak rangloka lir ma? Pai ne kibong nung yimsü asür asü? Teti tsüngchir süa jajatsü mulungtettang aser Tsüngrem tenzüktsütsü ne mulungjang lungjema liang.