Temulungjang nung süngyanglutem

” …. item nisung parnok mulung nung süngyanglutem yua lir. ” (Ezk. 14:3)
Meimchir taküm ka nung kanga tongtipang tesem kaji temulungjang ya lir. Kechiyong ibaji Kibubai bushiba tesem ka lir. Saka aiben nisung mulungjang nung süngyanglu ayuba tesem ka kümdaktsür, Aji koma sür? Temulungjangji Tsüngrem dak alaka shingaia manguba tesem, anungji yangji alibatem tangari angutsü makok. Aiben tema nungbo o tajung jembitsü akok, saka temulungjang nungbo tamajungba agi sünga lira ibaji temulungjang nung süngyanglutem ayuba den kasa. Mesüra, pei nem moatsüba agi kodanga tenük sunga mebilemer, saka temulungjang nungbo alima benbuba nem kokdaktsür. Ibajia temulungjang nung süngyanglutem ayuba den sako lir.
Ezekiel mapang nunga Tsüngremi nüburtem dang iba ama müma süngyanglu aliba den jembi. Parnoki kidang süngyanglu yanglua mayu, saka parnok temulungjang nung süngyanglutem liasü tamajung bilemba, tenük masüngba, tangar indang nükshiba, aser anemsüba. Ibala mapa jagi Kibuba amongdak menentsür. Ne mulung nunga süngyanglutem yua lir asü? Nai indoktsü merangang. Kibuba nüngsangba aser pa tushiba dang ne mulung nung mongdaktsüra ne mulung nung süngyanglutem kheni malitsü.
Sarasadem
Kibuba, Yisu Ni kü mulung nung na dang yimsü südaktsiasü, ni kü mulung nung süngyanglu raksa indoker. Amen.