Temulungjang temerük

Nisunger inyaksangshi aser libaliru nung tesüngmangtsü kaji asen mulungjangi kechi bilemer yamaji tenük agia angur. Ibaji shisatsü temerük aser tajung bilemertem asoshi temoatsü saka shisatsü memerük aser tamajung bilemertem asoshibo tejashitsüka asütsü. Tashitemetetertemi ashiba agi, asen kolok aser mulungjang nung tangar  yimya indang bilemtsü aser tangoktsü tashi ka agüja lir, anungji alima kati aotsü asüdang asen ket nung iba lima map bener apuso ama, kechi mapa nung südir süaka asenok ket nung temulungjangi bilemba map ka lir. Aji oda, Iba map-ji repranga dang asenok aotsü aser aseni lenmang memetetaka iba map jagi anitsü. Ibaji jangratemtsüka saka ano tajidaktsüka lir. Tatishitsü agi, asen ket nung aliba mapji meshitakra aseni tongnüba tesem matongtsü. Tetezü aseni abenba mapji tai süra tai lenmangi anitsü. Aji oda, Khristan taküm nunga asen ket nung bena aliba map-ji kanga tongtibang asütsü. Ibayongji, Laishibai ashir, temulung merüka alirtem tsüngdang ajak merüka angur saka memerükertem tsüngdangbo kecha temerük maka. ( Tita 1:15). Asen temulung nung  kechi bilemdir, ibaji aseni abenba mapji lir, anungji aseni tangar dak tamajung dang ajitetra asen ket nung aliba mapji tamajung bilemba map asütsü. Asenoki kechi bilemer, ibaji asen taküm yimya agi sayur. Asenoki benshiba jakla, jembiba o aser taküm yimya agi asenoki komaka bilemer, ibaji tangar tsüngdang sayua adoker. Aji oda, asen mulungjang nung tenükmerem, mokokaji aser ochimashi temenentem aliba agi, asenoki tangar taküm nunga kasa temenentemji dang angur. Iba jagi asen mepelar aser tangar den meputepteter. Iba ama temulungjang memerükba agi teti tangar dak tamajung reprangteter aser aitsür. Ajisüaka, asenok nük nung anak ia yur, kodaser tangar nük nung anak ia aliba endoktsütettsü (Luke 6 :41- 42). Asenok mulungjang merüka lira, asenoki tangar dak tamajung mereprangtettsü aser tangar dak mulung lemtettsü. Aiben asenok ochimashi asüba agi asenoki tangar daka temulung malemer aser tenüngsang agütsütsüsa tajung tilaka ta mangur. Ajisüaka, asen mulungjang merüka lira, Tsüngremi koma tangar dak repranger yamaji asenokia angutsü. Asen kiyongerbo mesüra asen adianu aser medemertembo nisung tajung ser nung asenoki temulungjang nung parnokji majung ama bilemba agi asen nükdang majung angur asütsüa akok. Aji oda, asen tenük nung temenen aliba agi tangar dak tajung alibaji reprangtettsü makoker. Anungji, Laishibai ashir, “Tenükji temang milen lir. Nü nük junga lira, nü mang ajak tesangwa agi asüngtsü, saka nü nük mejungi lira, nü mang ajunga tamang agi sünga alitsü.” (Mathi 6:22). Atangji, temulung nung abenba mapji asen tenük agi angur asünungji, asen taküm pelaa alitsü aser jashia alitsübaji aseni asen mulungjang nung bena aliba map dakji dang keta lir. Aji oda, asen tenük agi anguba agi asen mepelai kümra mesüra asen tenük agi anguba tamajungtem ajanga tangar den meputepteti lira, Tsüngrem dang temulungjang tasen aser temerük ka meshitsü kanga nüngdaker ta aseni angatetdi. Kü mulungjang merüktetjang aser  kü dak tamajung bilemba aser tangar dak tamajung anguba memerükba mulungsentsü endokjang ta asenoki sarasademdi. Ni tangar indang tamajung bilemba map bena aliba ya tajung bilemba map agi melenjang ta sarasademdi. Tsüngremi temulungjang temerük aginer aser asenoka asen mulungjang merüka ali nung dang pelaa alitsü. Temulungjang ya tepela apokdak, anungji temulungjang merüka lira, iba nung jagi apokba tzüjia temerük, tajung aser tepela tzü asütsü.