Temulungjang temerük

Asenok jembishinü aser inyaksangshiba yimyayimpong agi asenok mulungjang sayur. Tetezü, asen mulungjang mesüra mulungsentsü memerüki tamajung dang bilema lira, asenoki tangar daka tamajung dang reperangtettsü. Ibayongji, Yisui asenok dang Luke 6:42 nung asenok tenük nung aliba anak tama endoker külenang tangar tenük nung aliba anak reprangtsü ajungshia lir. Atangji asenoki tenük agi angur saka asen mulungjang nung kechi bilemer iba amaji dang asenoki reprangtettsü. Aji oda, asenok mulungjang memerüki lira, asenok tenük agi tangar dak tajung aliba mereprangtettsü. Ajisüaka, kodang asen mulungjang merüka lidir asenoki tangar dak tajung aliba reprangtettsü aser tangar indang tamajung mebilemtsü. Tenyar Paul-i pa den külemi Tsüngremer wadang nung temulung ka ser inyaksang Tita dangi züluba shiti nung, ” Temulungsentsü merüka alirtem atema ajak temerük asütsü saka temulungsentsü memerüker aser mamangba purtem tsüngdang ajak memerük asütsü, kechiyong parnok shisatsü aser temulungjang memerük lir,” ta Tita 1:15 nung shia angutsü. Kodang, asenok mulungjang nung tajung bilemer asenoki tangar anema mebilemer aser tangari tamajung bilemyonga asenoki item tamajung melena tajung agütsütetter. Tangar majung masükba aser tangar nüngsen mejembiba tebang temeliji shisatsü temerük adenba purtem dak keta lir. Item jagi tangar tai mapur saka kechi  tajung aji repranga tenüngsang agütsür. Iba jagi adianu aser medemertem rongnung teputep adoker. Shisa tajung aser temulung temerük nungi temeim adoker aser tangar asoshi tayari aser temoatsü angudak taküm ka akümer. Aji oda, Mathi tapu 6:22 nung Yisui asenok dang angatetdaktsünüba o tongtibang kaji ,asenoki tangar dak tamajung ajitetra asenok pelaa malitsü aser iba mepelabaji tulu asütsü saka asenoki tangar dak tajung ajitetra asenok kanga pelaa alitsü ta shia lir. Aji oda, asenok libaliro nung asenok tamangertem asoshi tongtibang kaji, asenok temulungjang aser shisatsü merükmerüka alitsüba ya lir. Asenok shisatsü memerüki lira asenoki angashiba kecha nunga tajung mangatetsü aser shinga daka temulung malemtsü. Tanübo asenoki asenoksasa asenok mulungjang ken meyipa reprangdangdi. Asenoki tangar indang tamajung bilemer asü ? Tangar dakbo tamajung-tamajung dang reprangtetter asü ? Nai tangari inyakba mapa ajak nung aija anidaker asü ? Iba ama shisatsü agi na  mepelateti lira, tang nai Tsüngrem dang nü mulungjang, nü mulungsentsü aser nü shisatsü ajak merüktetjang ta shiang. Nai Tsüngrem nem nü mulungjang tejenbaji agüjang aser aji tasen temerük ka agi melenjang ta shiang. Nai ochi mulung agi, tang Tsüngrem dang shisatsü tajung adenba temulungjang temerük ka aginer ta shira, Pai nü nem iba temulungjang temerükji agütsütsü aser tanü nungi na pelaa alitsü. Ibaji na asoshi shi atema mozü tajungtiba aser tanüla asoshi tekümtet jenjang tulutiba angur asütsü.