Temzüng ajanga kechi chinüra achitsü temeten agütsür: Mehbooba

Jammu, October 28 (Agencies): Nashi shi achiba onük nung linük nung mangatettep tulu adoka aliba mapang ka nung tanü PDP tongti, Mehbooba Mufti-i, India Temzüng ajanga nisung kati pei kidang jara telungtet pezü nung kechi chinüra achitsü temeten agüja lir, ta ashi.

“India Temzüng nung, tangar melungjang meyirutsüi nisung kati pei kidang jara pezü tsüngda kechi chinüra achitsü temeten agüja lir,” ta Mehbooba-i Jammu nung osangbenertem dang ashi.

“Menjang alia achitsü saaka kümogo, jenjang kanga tuogo aser yangi tang nüburtemi kechi shi achitsü mesüra kechi shi machitsü iba indangji jembir,” ta lai ashi.

Dadri nung nashi shi achi ta tai tonglokja Muslim nunger ka tepsetba sülen nungi tenzüka linük nung secularism atema ola adokba atema pelar ta shia lai, item ama tatalokba anema lungkak aita pei award meyipa agütsürtemji Hindu nunger lir, ta ashi.

“Pei tekabu nung temzüng yuner nisung ishika lir, item nisung yagi rara adokdaktsüba nung shilem agir. Item ama tatalokba maginertem kanga agia timba lir. Tawa pei award meyipa agütsürtem ya shisashirtem lir aser parnok ya Muslim nunger masü saka Hindu nunger lir,” ta laisa ashi.

PDP tongti, “Rara adokdaktsüba aser mepetmesü adokdaktsüba anema ola adokertemji Hindu nunger lir. Iba linük Temzüng ajanga tebilemtsü onük ajak bentettsü, ta ni tamang akar,” ta ashi.

“Tamangba yimsü balala aser yimtenren party balala kecha tebendang makai temzüng alema inyakertem tekabu nung ozüng abentsü memelatsüla aser temerenshi tulu agütsütsüla,” ta laisa shisem.