Temzüng alema inyaker temaba jenjang 10 nung Modi lir: Azam

Kanpur, Dec. 16 (Agencies): Samajwadi Party lenir aser Uttar Pradesh Minister, Azam Khan-i, alima nung temzüng alema inyaker temaba jenjang 10 rongnung Ato kilonser Narendra Modi densema lir, ta ashi.

Kanpur nung osangbenertem den jembidang Azam-i, “Modi-i Ato kilonser inyaktetra, kechiba nibo meinyaktettsü (?) Alima nung temzüng alema inyaker tematiba jenjang 10 nung alir tenüngtem nai Google nung reprangdanger ma (?) Iba ya ni ashir masü. Iba ya Ato kilonser tenüng lir,” ta ashi.

Khan-isa, pa-a Ato kilonser kümner, kechiyong iba menden atema pa temsüa lir, ta ashi.

Paisa, mapang tetemsü ka nung Samajwadi Party tongti, Mulayam Singh-i iba menden atema pa shimtsü, ta ashi.

“Linük nung Ato kilonser akumtsü atema nisung tetemsübaji ni lir aser ni Ato kilonser kümner. Narendra Modi-i pa menden toktsüra aser MP ajaki ni Ato kilonser shimra ibaji ajanga linük nung osang tajung proktsü aser anogoshia India nung terenlok alitsü. Kodang mapangi sempetdir Mulayam Singh-i kü tenüng benoktsü,” ta Khan-i ashi.

Azam UP deputy chief minister kümdaktsütsüla ta Lucknow nung poster ajanga akhangba dak sentakba nung osangbenertemi asüngdangba langzüdang pai, “Nenoki ni mezüngmeshir. Ni Ato kilonser kümner aser iba menden atema kü dak langa lir. Iba yongji ni deputy CM takhangba poster ji intok,” ta ashi.

Delhi Chief Minister Arvind Kejriwal indang Principal secretary, Rajender Kumar indang office CBI-i mita reprangba dak sentakba nung Azam-i, Central sorkar aser Bharatiya Janata Party (BJP)-i yimtenren akhüm metsübuba sayuogo, ta ashi.

“Iba ya kar pusema inyakba mapa ka lir ta ajaki meteta lir. Jilia temelaba magii shingaia linük nung chief minister tem office mita mereprangtsüla,” ta paisa ashi.

Tamalen Khan-i 2002 küm Gujarat rara nung Ato kilonser Modi-i shilem agia lir ta aija pa dang tasüngdangba kaogo.