Temzüng alema nashi shi belenba sorkari mittsü

New Delhi, October 06 (Agencies): Dadri nung nashi shi achi ta tai tonglokja olulu prokba sülen tambur ka tepsetba ajanga mangatettep tulu adoka aliba mapang ka nung Mongolbar nü sorkari, temzüng alema nashi shi tangaleni yokba mittsü atema jahaz anenba tesemtem nung testing labs amenoktsü, ta sangdongogo.
Temzüng alema tangaleni nashi shi yokba atema agri-export promotion tentet, APEDA, Food Processing Ministry aser Agriculture Ministry nungi ketdangsertem den senden ka amenba sülen Minister of State for Agriculture, Sanjeev Kumar Balyan-i iba sangdong agüja liasü.
“Senden nung APEDA ketdangsertemi, temzüng alema nashi shi tangaleni meyoker, kechiyong production aser exports-i software ‘Meat Net’ ajanga ibaji junga mita repranger, ta shia liasü. Ajisüaka temzüng alema nashi shi tangaleni yokba mittsü atema jahaz anenba tesemtem nung testing labs amenoktsü lemtetogo,” ta Balyan-i osangbenertem dang ashi.
Tangaleni nashi shi yokba timbaka Mumbai port ajanga inyaker, ta paisa ashi.
Minister-i ashiba agi, software ajanga jahaz junga mitba ajanga taküm April nungi August ita tashi nung jang shi tangaleni yokba shilem 14.7 nungi US sen million 1,483 tashi ajema kümogo.
Jang shi tangaleni yokbaji shiruru tepsetba APEDA registered 49 ajanga inyaker, aser item rongnung UP state nungi 20 lir, ta paisa ashi.
Linük nung shiruru tepsetba ki 1,696 lir, aser item rongnungi timtibaji Maharashtra nung 316, Uttar Pradesh nung 285 aser Telangana nung 185 lir.