Temzüng amshi tenzükba anogo

Tanü ya linük ajunga nung 70 buba Republic Day amonger. Iba anogomong tetezü India nüchiso anguba sülen linük nung temzüng mapa küma amshitsü tenzükba anogo lir. India yimten nüchiso mengui British yimli kübok alidangbo Government of India Act 1935 ajanga British nungertemi yimsü süa liasü saka 1947 küm India nüchiso anguba sülen temzüng tasen latet aser 1949 küm November 26 nü iba temzüng ya tatar senden nung agizük aser 1950 küm January 26 nü nungi mapa küma amshitsü tenzük. Ibayongji, küm shia January 26 nü nübortemi shimtetba yimsüsürtem kübok linük temzüng mapa küma amshitsü tenzükba anogo amonger. 1930 küm India yimten nüchiso mangudang, Indian National Congress-i January 26 ya India nunger yimten nüchiso anguba anogo ta sangdong. Ibayongji, India yimten nüchiso shitakba ngur külena, iba anogoji mamadoki, Republic Day asütsü atema January 26 anogo shimtet. India yimten nüchiso angutsüsa India nungertemi British nungertem den raraba otsü aika lir saka tatemsa tashitait British yimliia maremi nüchiso jenjang agütsütsüsa raratetbaji, Mahatma Gandhi leniba kübok India nungertemi prangpong injang amshia tashiyim agi masü saka British government-i lisopurtem anema temzüng ozüng latetba nung manidaki yimten temeten jembia nokdakba telongjem tashi ajanga liasü. India nüchiso ngur hopta ana tsüngda August 28, 1947 anogo nungbo Dr.B.R.Ambedkar mendenbuba ser linük asoshi Temzüng Yangluba luden ka shima inyakdaktsü aser parnoki temzüng tasenji renemer 1947 kümsa November 4 nü tatar senden nem agütsü. Iba sülen tatar senden nung benoka jembir külenang nübortem nem metetdakja shisalemsatep aser temelenshitsü tashi melenshia inyaker külen tatar senden nung agizüka ayu. Iba sülenang tesüsa  1950 küm January 24 nü tatar ajaki temzüng copy ana, ka Hindi nung aser ka English nung ta teka agi züluba copy nung sign asü. Iba mapang tatar senden (Constituent Assembly) nung tatar züngsem 308 liasü. Item tatartem jagi temzüng kaket nungji sign ser anogo tanabuba nungiang iba temzüngji linük ajaklen mapa küma amshitsü tenzük. Aji oda, iba temzüng mapa küma inyakba den külemi Constituent Assembly ta jaya aliba nungi Parliamnent ta aküm aser kasa anogo nungi linük nung mezüngbuba tir Dr.Rajendra Prasad mapa tenzük. Atangji, linük nüchiso shitakbabo 1947 küm August 15 nüang angu saka linük asoshi temzüng balaka melatet tashibo nüchiso anguba tashiji amshitsü yimten tashi mali asü. Tetezü nüchiso anguyonga temzüng mamshitetra nüchiso anguba tetezü maka aser nükjidong matonger. Atangji, India ama oshi, tamangba yimsü aser sobaliba nung temeyoktep kin aika agi akümba linük ka küm 70 tashi telongjem meraksai arubaji takok tuluka asütsü. Iba takokji tanga tashi agi masü sala yimsüsür aser nübortemi linük temzüng akümtsübua pei ajung asaa masü saka linük ajungtsü asoshi bilema inyakba ajanga lir. Linük nung kechi ken o aser maparen nung südir süaka koba kin mesüra kechi tamangba yimsü amanger ta masü saka temzüngi kechi ashir ta asüba nung nübortem anepalur aser ken oa bendanger. Iba amaji temzüng agi dang nübortem longjemdaktsür. Iba tashiji memeteti tanü India nung yimsüsür kari India nungbo tamangba yimsü ka dang asütsü ta bilema inyakra, iba jagi küm 70 tashi India longjemer aruba telongjem raksadoktsü. Iba amaji yinten telok kari linük nung tamangba yimsü aser kin tapu aika liaka linük nung temzüngbo kasasa aser ka dang asütsü ta bilema inyakra, India telongjem ajasaa aotsü asoshi tetenzüker asütsü. Koba linük nung südirsüaka senso ajak linük temzüng kübok tashi angaa alitsü nüngdaker, kechiyong temzüng jagi sensosangertem alener masü saka temeten agütsür. India temzüngi senso shia nem pei amangnütsü amangdaktsür aser pei chiajemnütsü chiajemdaktsür. India temzüngi teküpbok tia nung alirtem mesor aser nübortem nem yimten tashi agütsür. Iba nüchiso jenjangji linük temzüngi senso ajak nem tang aser teti agütsütettsüsa, talisa, temzüng yanglurtemi aser obendangertemi mapa ajak nung ochishia nübortem asoshi inyaktsü tanü anogomong ajanga nenshir.