Tenem Ka Ama -T.Ken 125:1-5

“Yirusalem meketa tenem aliba ama, yamaji Kibuba pei nübur meketa lir, iba mapang nungi aser teti tatem maka” (t.2). Ken züluri kechi ashir ibaji angatettsü asoshi ali tema aser yangi aliba aika bushitsü menüngdak. Ibai tanü asenok taküm nung mapa inyaktsü tayongzükba ka lir. Laishiba nung Tsüngremji oset aika den medemdanga jembi.Tatishitsü, “Asen Tsüngrem tarungba mi lir” (Ibri12:29). Mesüra, “Tsüngrem asen jenokdak” (T.Ken 46:1). Yangi ken züluri Tsüngremji Yirusalem meketa tenemtem aliba ama lir ta ashir. Ibaji Tsüngrem aser Yihuda nüburtem asoshi yimti balaka liasü, aser asenok asoshia lir. Aser kodang ken züluri yimti meketa aliba tenemtemji reprang, pai ashi, “Ibaji Tsüngrem lenmang”.
Tsüngrem koda tenem mesük ? Mezüngbuba tenem kaji takang. Ken zülur tanir asüdang pai tenemtemji ngua liasü. Kodang pa asangur aküm, item tenemtemji idakji odang liasü, aser item tenemtemji tanga idakji odang lir.Yamaji Tsüngrem lir. Pa takang temulung lemtsü. Pa memelenshir. Tsüngrem yashi, tanü aser teti kasadang (Ibri13:8).
Tanabuba, tenem kati jenokdak agütsür. Tsüngremi asenok awabanger aser anüker. Pa Zion tenem ama lir. Tekong ka nung ashir, “Kibuba dak shirnoki temulung alemer Zion tenem ama lir, koba arakzütsü makok, saka teti alir”. Tsüngremi naa tenem ka mesüka yanglutsütsü akok- takang aser tejenokdak kechiaser Pa ne jenokdak aser tashi lir.
Anungji asenoki pa dak amangtsüla. Shirnoki Kibuba dak amanger parnok tashi itta aser kümzüka alir. Parnok nüngdak ajak akar. ” O Kibuba, tajunger dang, aser shirnok pei mulungjang indang indanga ali parnok dang jungangma” (t.4).
Na tejenokdak nüngdak dang Tsüngremi Pa nübur Lemang balaka nung anebalur ta bilemtetang. Tsüngremi pa nübur nem agütsüba tashi aser jenokdakji takang aser memelenshir. Pa amangang.