Tenemtsüng lenmang ali asübo !

Joko Khristmas anogo atongtsü hopta ka dang lir, anungji mapa ajak aritepa renemtsüba mapang ka saka asenok aika pei alidak nungi Assam ajanga Dimapur-i moutetter aser Dimapur nungia Assam ajanga pei alidaki moutetter ta asütsüsa tensa tia tamajung ka ajurudang, tenemtsüng lenmang (foothill road) renemteta aka nungbo koda jungla ta sasaa bilemer. Ano tang ama küm atemba mapang ya, tanurtem tesem balala nungi pei tsüraburtem kidangi sodi aruba mapang lir, ajisüaka ariena Dimapur tonger pei tsürabur ki metongtet amongtsübaji tezüdangtsüka lir. Atangji, Dimapur nungi Tizit tashi Assam majangi aotsüsa tenemtsüng lenmang maliba ajanga nübortem timatemba aser takoksa angubatem Kohima, Phek aser Peren district nung alirtemibo majangshitsü, anungji memetettsü aser shishia mebilemtsüa akok, ajisüaka Mokokchung, Zunheboto, Wokha, Tuensang, Kiphire, Longleng aser Mon district nung alirtemibo nüngdakji tangang tajungba rajema alitsü. Nagaland state kümer küm 60 jungdi asüdang, Assam ajanga mesenzüra asenok nüngdak sadema mesenzütettsüsa Nagaland nung alir Naga nungertemi litetbaji tangar tsüngdang taaktsüka dang lir. Tamalen timtem takoksa angubajibo yutsür, tang India tatar senden nung Citizenship Amendment Bill agizüka ozüng akümba anema Assam ajunga mokdanger anogo anasemka Assama ajanga mesenzütettsüsa akümba mapang, nübortem aika Dimapur nungi Kohima aser Wokha ajanga Mokokchung, Tuensang, Kiphire, Longleng aser Mon district leni aodang mapang endokba, gari totsü nung sen endokba, lendang chiyongba aser gari raksaba timtem takoksatemji sükdangra, amajok nung Naga nunger sen aika endoker asütsü. Item timtem aser takoksaji tenemtsüng lenmang ali nungbo majurutsüba aser meindoktsüba liasü ta danga asenoki angatetra, iba tangatetba kisüng jagi ajungshitepa tenemtsüng lenmang ya yakta renemtettsü. Nüngdakba indangbo ajaki jembir saka mapa küma inyaker mali ta alidang, asenok Aoertemia ajungshitepa Nagaland Foot Hill Road Coordination Committee tenteta state government ket nung sen meliaka, tarutsü nung meyipa angutsü teimla nung sen akar contractor kar dang mepishia lenmang atu tenzükdaktsüba anogo nungi tenzüka, iba lenmang asoshi government-ia sen terabo agüja yamglu tenzükogo. Ajisüaka, Naga nungersa tia maka, Doyang apu renemtsüba mapang süia merenemtetba den tanüngba mapa asoshia government-i senotsü melemzüktsütetba agi tang tashi lenmang tesadem tajung asütsüba agi lenmang mali kümogo. Ajak asoshi nüngdak saka asenok asoshisa tenüngdakba amai bilema, government ajungshia yakta inyakdaktsütsü nükjidong nung ABAM kübok aliba arogotem nunga tenla sen sarua government nem agütsüogo. Iba sen toa koba ‘Head of Account’ nung enoka lir aser government tebilemba kechi lir, itemji tatar senden nung khen danga süoka jembi nungbo ajak atema tajung süla. Independent ta asüba ya tangar kin yimten temzüng kübok maliba kija dang masü saka peisasa pei taküm litetba, tangar lima ajanga mesenzüyonga pei lima nung nüngdak ajak inyakteta pei lenmang nung sademsadema jajatetba, tangalen maoyonga pei lima nung kaketshisatsü tajung anguba, tangaleni maoyonga pei lima nung taneptsü ngutetba aser tangar dang maliyonga peisasa züsentetba aser yanglutetba agi pei nüngdak peria nguteta litetba nisungtem aser parnok limaji Independent anguba lima ka lir. Atangji, Naga nunger melongjemba agi, tang tashi yimten nung Independent mangu asenok timatemer aser ano külen, tenemtsüng lenmang tatsüka meyanglutetba agi, asenok Assam nungertem dang nungi Independent mengutet yamai anak auyi mélanga senzüba tia ya taaktsüka lir. Iba tia yagi, joko Nagalang nung alir Naga nunger lenirtemi pei kija ajangzüktsü mebilemi pei lima aser nübortem anisüngzüka lidaktsütsüsa bilema inyaktsü tayongzükba tuluka agütsür. Iba ama mapang nung ano khen Coordination Committee tashi itshitsüla aser arogo nungertemia sen tenla agütsüba to tatem mesüi maneni lokti sarasadem sentong ayongzüka sarasadem sentong agitsüla.