Tenemtsüng lenmang yakta renemdaktsüner

Dimapur, Dec. 22 (TYO) : Nagaland nung Konyak, Ao, Sema, Phom, Khiamniungan, Sangtam, Chang, Yimchunger, Lotha aser Rengma nungertem alidak nübortem timtem ajuruba state government-i junga mereprangba agi kanga timtem tia nung lir, kechiyong parnok ya Assam ajanga dang Dimapur aser Kohima atonger ta tebu tedi N.Hotongse Sangtami metetdaktsüogo.
Aiben Assam nung telok balalai mokdangba sentong ayongzüker aser Naga nunger süisüpongertem nem timtem agütsür. Aji oda, tenemtsüng lenmang ya renemtet nungbo Naga nungertem Assam ajanga senzüdang endokba senotsü ya Nagaland nung endok nungbo state asoshi teyari tuluka süla ta paisa ashi.
Nagaland government-i Nagaland nung aliba district ajak sendaktepdakja tenemtsüng lenmang yanglutsü asoshi lemtetbaji mapa tajung ka liasü saka mapa küma meinyakteti alidang nübortemi tenemtsüng lenmang yanglutsü mulungtetbaji tenüng asangtsü tetemsü. Iba lenmang yagi Niuland, Rengmapani, Bhandari, Baghty, Tzürangkong, Tuli, Shetap, Naginimora aser Mon tashi kanga renloka aotsü aser iba yagi Mokokchung, Longleng, Tuensang, Zunheboto aser Wokha districts nung alirtem ajangzüktsü. Item tajangzüktemji asangsang nung agitettsü atema iba lenmang agi ajanger ali kiburtemi alimenok (compensation) magitsü lemtetbaji Nagaland nung otsüsa jembitsü mapa tajung ka asütsü ta Hotongseisa metetdaktsü. Iba denji linük tenzükertemia iba lenmang yanglurtem dangbo alimelen magitsü lemtetbajia mapa tajung ka liasü ta paisa ashi.
State nung koba teloki yimsü südir süaka, nübortem asoshi terenlok mapa inyakbaji tajung, anungji ajaki temulung agüja inyaktsüla aser shingaia menokdangtsüla ta Hotongse-isa metetdaktsü.
Tangbo Nagaland nung Kohima, Dimapur aser Peren district nung dang terenlok mapa inyaker, aji junger saka ano tanüngba district nunga kasasa terenlok mapa inyaktsü asoshi tanüngba constituency nungi adoker tatartemi tatar senden nung nübortem nüngdak jembitsüla aser Chief minister, T.R.Zeleiang-i aniba state government-i nangzükba ama tenemtsüng lenmang ya tekaratiba nung renemer gari jajatsüsa yanglutsü kanga nüngdaka kümogo ta Hotongse-isa metetdaktsü.