Tenemtsüng lenmang yangluba osang

Kohima, August 09 (TYO): Brihostibarnü Nagaland Legislative Assembly pezübuba session nung tasüngdangba ka langzüdang Roads & Bridges portfolio repsema bena alisang Deputy Chief Minister, Y. Patton-i, PWD (Roads & Bridges)-i Tizit nungi Dimapur tashi foothill connectivity mapa ya sen crore 235 agi yanglu, ta metetdaktsü.
Senden nung opposition MLA, Imkong L. Imchen-i asüngdangba langzüdang Patton-i, iba mapa ya 2013-14 küm Special Plan Assistance (SPA) kübok agizüka lenmang malidak (missing linük) lenmang tasen atuba maparen tenzüka liasü; lenmang tasen atuba mapa renemogo saka tanüngba ‘pavement’ mapa ano metenzük, ta metetdaktsü.
Paisa, 2013-14 küm payment sen crore 40 agütsüogo aser 2014-15 küm ano sen crore 270 agütsüogo, aser mapa ya contract nung inyaker, ta metetdaktsü.
Patton-i, tamalen lemzüktsüba sen ajanga mapa inyakba sülen 2014-15 küm nungi SPA (Special Plan Allocation) kübok sen lemzüktsüba anen, ibayongji tang aliba lenmangtem nung kilentzü aodak/pavements/apu/lenmang junga yanglushiba mapa meinyakteter, aser tang tashi nungbo iba lenmang nung gari senzütsüsa masü, ta metetdaktsü.
Patton-isa, Nagaland arrtsülen tenemtsüng nung gari lenmang ka yanglutsüji kanga tongtibang, ta tangatetba nung Ao Baptist Arogo Mongdang (ABAM)-i sen 36,56,282 tenla agütsüogo, ta metetdaktsü.