Tenemtsüng lenmang yanglutsü sen maka : NFHRCC

Dimapur, July 24 (TYO) : Center sorkar inyakyim nung Planning Commission (PC) melena inyakyim tasen tenzükba agi Nagaland nunga tenemtsüng lenmang tangsa tangbo meyanglutettsüsa kümogo, kechiaser iba mapa ya Planning Commission kübok Nagaland nung Special Plan Assistance (SPA) ajanga inyaka liasü.
Yashi Dimapur nung Nagaland Foot Hill Road Coordination Committee (NFHRCC) purtemi osangbenertem den jembidang, parnoki chief minister T R Zeliang, Advisor to CM, Sungit Jamir aser Dr. Benjongliba Aier, parliamentary secretary nungertem Kohima nung July 22 nü ajurua jembiogo saka parnoki tenemtsüng lenmang asoshi taküm senotsü sentong nung sen meinoktetba osang metetdaktsü.
NFHRCC purtemisa ashiba agi, taküm 2015-16 küm budget nung iba mapa atema sen melemzüktsüra “foothill road” yangluba mapa ya meinyakteti anentsüsa akümtsü.
Ibayongji, mapabosa maneni inyaka aotsü atema parnoki chief minister TR Zeliang, shibai chaplee kilonser mapa dena bena lir, pa dang lenmang kar nungibosa senotsü bener arua tenemtsüng lenmang yangluba sentong nung enoktsütsü asoshi shiogo ta NFHRCC purtemisa metetdaktsü.
Iba mapang chief minister-i parnok dang ashiba agi, center nung Planning Commission anentsür külen NITI AYOG -i melenba ajanga senotsü alemba yimya melenshiogo aser iba jagi Nagaland nung tenemtsüng lenmang yanglutsü asoshi Special Plan Assistance ajanga senotsü ngua aliba anenogo. Iba maparen nung center nungi telangzüba arutsü atadagi ta Chief minister-ia iba lenmang yangluba mapa maneni inyaktsü asoshi bilema aliba ken o ka lemsatepdang metetdaktsü.
NFHRCC-isa chief minister dang tang tashi nung tenemtsüng lenmang inyaker contractor-tem nem sen agüja malinungji, iba senji yakta bushitepa agütsütsü asoshi takangba agütsüogo. Iba kasa tebilemtsü reprangtsü asoshi chief ministeri Finance Commissioner dang shiogo ta Committee purtemi metetdaktsü.
Iba tenemtsüng lenmang yanglutsü atema 2013-14 küm sen crore 40 lemzüktsü aser iba sülen 2014-15 atema sen crore Rs. 30 lemzüktsü saka shitakba senjibo crore 27 dang angu aser ano iba nung jagia department-i sen crore 4 dak tali katizüka ayu aser tanüngba sen lakh 2269.92 ji civil deposit nung yua lir ta NFHRCC purtemisa metetdaktsü.