Tengnoupal nung aluyimer ka pokset

Imphal, Mongputeni/October 9 (Agencies): Hombar aonung Tengnoupal nung Machi police station kübok Tollen yimtsüng nung nisung ka Chinese-made hand grenade ka apokba sülen poksetogo.
Asüsang ya Churachandpur district nungi arishi küm 24 tain Satminlun Gangte ta jangjaogo. Pa ya aluyimer ka liasü.
Osang ajanga ashiba agi, Hombar aonung Gangte ya süngmok tsünütsü atema tesem merekteter rongtokba mapang grenade ya poka liasü, ta police-i metetdaktsüogo.
Police sangdong ajanga ashiba agi, grenade ya security personnel tem amaktsü asoshi bener aruba toktsür aoba asütsü südi, shirnoki iba tesem nung temesepba mozü shibelenertem aser ozüng raksartem kanga kümdanga meita arudar.
Tawa Tengnoupal district nung bomb apokba lendong kar atalokogo. Taoba anogo ti tsüngda district nung Moreh police station dak rangloker bomb agi amakba tatalokba ana tashi atalokogo.
Kasa mapang nung ketdangser sangdong ka ajanga ashiba agi, temesepba mozü shibelenertem apuba aser ozüng raksartemi timtem bener arutsüba sülen 43 Assam Rifles sepaitemi Manipur-Myanmar arrtsü nembangtsüogo.