Tening jila nung temesepba mozü anema rally agi

Dimapur, Rongjui/Sept. 30 (TYO): Temesepba mozü amshiba anema rally ka September 29, 2023 nü Tening jila nung aliba Town Square nung “People First, Stop Stigma, Discrimination and Strengthen Prevention” omen kübok agia liasü.

Iba sentong ya District Administration ajanga Anti-Drug Committee Tening (ACT) den lungjemer ayongzüka liasü.

ADC Tening, Lemlila Sangtam, NCS ajanga iba sentong nung o tatsüka jembidang lokti ajungmesoa pei sasa pei yaria aser nüburtem temesepba mozü nungi kumzüka alitsü indang ashi.

Tening jila nunger tanurtem aser kaketshirtem ya Naga nunger tarutsü nükla lir, anungji temesepba mozü anema telungjem nung nokdaktsüla, ta lai ashi.

Temesepba mozü achi-ajemba ajanga kaketshir tekolok aser temang tashi mait kumdaktsü aser tashidak balala menar, ta lai ashi.

ADC Tening ajanga lokti tentet balala, CSOs aser kaketshir tentet tem dang temesepba mozü maliba lokti ka kumdaktsütsü ayongzüka liasü.

School aser dangar temi iba sentong nung shilem agiba atema lai tenüngsang agütsü aser tarutsü anogotem nunga Administration ajanga akokba lenmang nung yariteptsü molunga lir, ta ashi.

President, Tening Town Youth Organisation, Kaibakam-i iba sentong nung jembidang, temesepba mozü achi-ajemba ajanga temang aser tekolok menentsüba kisüng masü saka pei career ralsatsür, ta ashi.

Anungji nisung ajaki temesepba mozü dang ‘mah’ ta ashitsüla aser awareness prokshia pei aser aseni meima aliba takum kumzüktsüla, ta ashi.

Iba sentong nung President, Liangmai Council (N) aser President, Zeme Council, Tening Town nungeria o tatsütsü jembia liasü.

Iba sentong nung GHSS, Baptist High School, SFS School aser Heraka School Tening nungi shilem agia liasü.

Iba sentong ya tenzüka Youth Pastor, TNBP, Khiupume-i sarasadem, Keringseyi Ringdy aser medemer temi ken ka aten aser President, TSU ajanga melepzüng o jembia liasü.