Tening nung matamabensar atema vaccination drive ayongzük

Dimapur, Aami/June 21 (TYO): Social Welfare Department, Tening ajanga Administration aser Medical department den lungjemer Tening CHC nung Persons with Disabilities (PWDs) pur atema Awareness-cum-vaccination drive sentong ka June 21, 2021 nü ayongzüka liasü.
Matamabensar aser nüburtem asoshi COVID-19 mozü ya kota tongtipang, ta asüba onük nung Additional Deputy Commissioner aser Chairman, Sub-Divisional Task Force for COVID-19, Tening, Rosietho Nguori, NCS ajanga jembia liasü.
COVID-19 tashidak wara agi tetsür-tebur, jenjang, sentsü nung tepensa makai kongshiogo, aser yangji matamabensar tema dena lir, ta pai ashi.
Tang atemabo iba virus nungi nisung ka kumzüka alitsü lenmang ajak agi mozü agitsüba ya dang lir, anungji sorkari agütsüba maongka agitsüla, ta pai ajungshia liasü.
Timtem kar adokra, Administration den medical team ajanga akokba lenmang nung yaritsü molunga lir, ta ADC ajangasa ashi.
Iba sentong nung MO, AYUSH, Dr. Nuksung Jamir aser Disability Representative, Cherachun nungeria o tatsütsü jembia liasü. Iba sentong nung Poshan Block Coordinator, Social Welfare Department, Dibin Nbung menden liasü.