Tenla ki yangluba atema saru meshirtem aitsür: DAYO

Dimapur, Luchii/December 02 (TYO): Aoyim village nung Tenla ki tasen yangluba atema saru meshiba nung shilem agirtemji Dimapur Ao Youth Organisation (DAYO)-i sashia aitsür, ta tanü DAYO Tir, Aotemsu Aier aser tongti tezülur, S Pangertoshi nati sangdong ka ajanga metetdaktsü.
Iba ken o dak sendakba nung Dimapur Police-i Khehokhu village nungi NNC/FGN nung leacy, Kughato Swu puogo; pa nemji bail magutsütsüla, kechiyong pai Naga nunger Arogotem aser amangbapurtem kanga mezüngmeshiogo, ta sangdong nung shia lir.
“Talisa iba Tenla ki yangluba nungi sen akhangba ken o nung tanga yimtenren teloktema densema lir, anungji police-i parnok ajakji aputsüla; Naga linük tenzükertemi tang aliba ceasefire nungi maongka agir aser Arogo anema inyaker, kechiyong parnok dak tangatetba tajung mali,” ta sangdong nung shia lir.
DAYO-i tangatetba tajung alir senso ajak dang asen lokti nung ozüng alema saru saruba anema longjemer ola adoktsü ayongzüker. DAYO-i Public Action Committee (PAC) of Naga Council nem tenüngsang agutsür aser ajang-ajanga nungiter. DAYO-isa Dimapur Police-i sensotem atema mapa tajung inyakba asoshi tenüngsang agutsür, ta DAYO-isa metetdaktsü.