Tenla ki yangluba atema tax memeshitsüla: DAAPBF

Dimapur, Yimpoksüi (November) 20 (TYO): Naga National Political Groups (NNPGs)-i tenla ki yangluba atema-a tax meshiba osang angashia kanga aoksar aser temulung raksar ta Dimapur Area Ao Baptist Pastors Fellowship (DAAPBF)-i metetdaktsü.
October 9, 2017 nü Aoyim Baptist Church nung tenla ki tasen yanglutsü atema meshiteta sarasademer mapa tenzük, saka mapa tenzükli nungi NNPG balalai mapa inyakertem (non-local) dang nungi tax meshitsü tenzük.
Arogo züngsemtemi küm aika tenla ki tasen yanglutsü atema tenla aser ter shilem bendena aru. Talisa local mapa inyakertem peria maliba ajanga non-local nisungtem nem taa agüja mapa inyakdaktsür, ta parnoki ashi.
Iba ken o atema DAAPBF rongdak senden ka ayonga amen aser idangji tenla ki yangluba atema tax meshibaji Khristan yimsü aser Laishiba tesayuba anema inyakba mapa ka lir ta bangzüngtep. Iba ama inyakyim ya tesempatsü ka lir aser meinyaktsüla, ta DAAPBF-i metetdaktsü.