Tennis osang: Bautista, Dimitrov & Djokovic nungeri takok angu

Chennai/Perth/Doha, January 08 (Agencies) : Deobarnü Chennai Open asayamung final asaya nung Spain nunger Roberto Bautista Agut-i 6-3, 6-4 agi Russia nunger Daniil Medvedev madak takok ngua asayamung indang takok marok nguogo.
Medvedev-i hopta piyong kanga junga asaya ajisüaka kanga nüngdakba asaya nung tia makai takok mongutet. Aji oda süaka tar 6.6 talang Russia nungbai yaküm küm tatemlen top 100 rongi aita taküm atema kanga junga asayatsü tenzükogo.
Yaküm final pungu asayasang, Agut-i iba takok marok anguba mapang top 10 jenjang atongtsüji kü nükjidong lir, ta ashi.
Brisbane International tennis marok Dimitrov-i benogo
Deobarnü Brisbane nung Brisbane International tennis asayamung final asaya nung Bulgaria nungi tennis asayar Grigor Dimitrov-i Japan nungi world no. 3 Kei Nishikori madak 6-2, 2-6, 6-3 agi akok.
Dimitrov-i iba asayamung marok angutsü atema top 10 nung alir nisung asem – quarter-final nung Dominic Thiem, semi nung Milos Raonic aser final nung Nishikori nunger- madak takok angu. Pai 2014 küm Queen’s Club nung takok anguba sülen ibai mezüng takok angurba lir.
Dimitrov ya world no. 8 liasü saka yaküm küm tom ka nung no. 40-i aluba sülen ano küm tatemibo world no. 17 nung tembanga liasü.
Qatar ExxonMobil Open final nung Djokovic-i takok angu
Ano Doha nung Qatar ExxonMobil Open asayamung final asaya nung world no. 2 Novak Djokovic-i mang ayanger amato World no. 1 Andy Murray madak 6-3, 5-7, 6-4 agi takok ngua iba asayamung indang marok benogo.
Honibar aonung akokba ya Serbia nungbai Rogers Cup abenba sülen mezüngbuba takok lir, ta Association of Tennis Professionals (ATP) website nung shia lir.
Arishi küm 29 tain, Djokovic-i final asayadang teka anaprong mekanger telok dang pa pusemtsü ajungshia liasü.
“Küm tetenzükdang aginüba mapang ka ajuruogo. Iba asayamung nung asaya pungu tashi takok nung asaya aruba sülen ano World no. 1 den gondha ana tashi asaya akokba ya jangratemtsüka lir. Küna pronglai kanga meranga asayaogo,” ta asaya temer külen Djokovic-i ashi.