Tenokdangba agütsüba ama inyaktsüla : Neiphiu Rio

March 23, 2020 nü Chief Secretary indang Office chamber nung Chief Minister Neiphiu Rio-i District Task Force ajak den video conference alidang agiba noksa angur.

Dimapur, March 23 (TYO): Nagaland chief minister Neiphiu Rio-i Hombarnü state nung alirtem dang sorkari coronavirus atema mapa balala inyakba nung yariteptsü ayongzük.
Kohima nung Chief Minister’s Secretariat nung Neiphiu Rio-i COVID-19 atema jembidang “Tang tashi Nagaland nung iba virus aketer ka danga puteta mali, saka iba atema asenoki zübazülemtsü mesüra azüoktsü atema inyakba mapatem anentsü nüngdak madoker” ta ashi.
State health department aser health mapa inyakertemi iba virus prokshiba noktangtsü atema tanen makai inyaka arudar. Iba tashidak atema department kanga junga renema lir aser nüngdak adokra anepalua yaritsü renema lir, ta Rio-i ashi.
State sorkari tetuyuba aika agütsüogo aser public senzüsenbongba noktangtsü, public tesemtem noktangtsü aser virus prokshiba azüoktsü atema mapatem inyaker, ta paisa shisem.
“Public-ia sorkar den amalitepa novel coronavirus madak takok angutsü atema yaritepba atema tenüngsang asgütsü. Nübortemi maneni pei temang merüka ayutsü aser lokti nungi pila alitsü ayongzüker,” ta Nagaland Chief Minister-isa metetdaktsü.
Iba dak sendakba olulu aser taila osangtem prokshiba noktangtsü atema nübortemi ketdangsertem den yariteptsü mepishir, ta paisa shisem.
CM Rio-isa tangalen nungi aruba nisungtem aser talisa kaketshirtem dang quarantine asütsü atema mepishi.
“Nenok yaritsü atema Niathu Resort, Dimapur aser Cricket Academy, Sovima renema lir” ta paisa metetdaktsü.
“Asenoki aoksatepa petsaprong masütsüla saka kanga dang kümdanga aser kümküma alitsüla” ta Rio-isa shisem.
“Iba ama majurudangba mapang ajurudang, asenok ka küma longjemer inyaktsüla. Team Nagaland nung senso shia züngsem ka ka lir aser asenok longjemer tetsükdaktsü ajak koktettsü” ta paisa ayongzük.
Tanü Neiphiu Rio-isa COVID-19 atema district task force tem den video conference ka agi.
Iba mapang Rio-i Deputy Commissioner temi anir district task force dang osang tejangja sangoktsütsü aser tensa jungjunga reprangtsü atema tetuyuba agütsü.
District ajak nung tang nüngdakbatem ajak peria lir anungji nübortemi petsaprong masütsüla, ta paisa metetdaktsü.
Nagaland CM-isa Deputy commissioner tem dang village guards nem international border anüktsü atema tetuyuba agütsütsü ashi.
Paisa, iba mapa nung NGO aser civil society tem nem shilem agidaktsütsü atema ayongzük.
Iba mapang District Task Force temia parnok tebilemtsü aser temepishibatem metetdaktsü aser item ajakji sorkari reprangshimtsü ta Chief Minister-i ashi.
Iba video conference nung Chief Secretary Temjen Toy IAS-ia ashiba agi “District Task Force-i osang agütsüba ajak agizükogo aser nüngdakba mapatem inyaktsü.”
“District ajak nung ventilators, PPE’s, mask sanitizers amala peria maliba ashir aser itemji anepalutsü. Ajisüaka, item tenüngdaktsütem ya Nagaland nung dang masü saka linük ajungalen peria mangu timtemer” ta Temjen-isa ashi.
“Nagaland sorkari iba tebilemtsü ya Centre den lemsatepogo aser state ajak nem peria agütsütsü atema inyakdar. District Task Force-i district ajak nung tensa jungjunga reprangtsü ayongzüker” ta Chief Secretary-isa shisem.